Unaza, kryebashkiaku Veliaj: Na duhet bashkëpunim për të ardhmen e Tiranës
Kanë
vijuar edhe gjatë ditës së djeshme prishjet objekteve që preken nga projekti i Unazës së Madhe në zonën e Astirit. Inspektorati i Mbrojtjes së Territorit i Bashkisë Tiranës prishi disa objekte që gjendeshin në lotin 2 dhe 3, dhe që shërbenin si lavazhe, dyqane për materiale elektrike. Sipas Bashkisë së Tiranës deri më tani në këtë aks rrugor janë mundur të prishen afro 30 ndërtesa pa leje që shërbenin për aktivitete të ndryshme që nga banesat e deri te lokalet apo lavazhet. Ndërkohë që vet kryebashkiaku Veliaj duke folur gjatë përurimit të urës së këmbësorëve në afërsi të Pallatit me Shigjeta tha se e ardhmja e Tiranës varet nga bashkëpunimi, ndërsa kërkoi prej banorëve të kryeqytetit mbështetje për projektet publike. "Thirrja ime për të gjithë qytetarët është: Na duhet bashkëpunimin, na duhet energji pozitive, inkurajim për çdo projekt publik. Ndaj, edhe jam i lumtur që edhe 100 metra më poshtë ku ka filluar projekti i Unazës, kemi një bashkëpunim total nga qytetarët, si nga tepelenasit, si nga tropojanët, si nga korçarët, si nga kuksianët. Fakti që të gjithë kemi kuptuar se pavarësisht se çfarë ka ndodhur në 20 apo 30 vitet e fundit, e ardhmja e Tiranës varet vetëm nga bashkëpunimi ynë, ky është një lajm shumë i mirë",deklaroi Veliaj. Ministria e Transporteve dhe Bashkia e Tiranës kanë parashikuar që të prishin mbi 120 ndërtime pa leje vetëm në segmentin nga Pallati me Shigjeta deri te Dogana, ndërsa kanë ofruar dëmshpërblim të plotë për ata që i kanë ndërtimet me leje dhe banesa sociale e bonus qiraje për ata që i kanë pa leje.