Moti i keq "paralizon" gjithë vendin, izolohen mijëra banorë në zonat e thella
Ortekë në Tropojë, bllokohen akset rrugore. Pezullohet mësimi në disa shkolla Shembet çatia e një karburanti nga pesha e borës, humb jetën punonjësi 53- vjeçar në Shkodër
Reshjet e dëborës dhe ngricat kanë "parali zuar gjithë vendin. Që prej disa ditësh, mijëra banorë në zonat e thella janë izoluar nga veriu në jug. Burime zyrtare bëjnë me dije se situata paraqitet më problematike në qarqet: Dibër, Kukës, Shkodër, Korçë dhe Gjirokastër. Krahas problemeve në qarkullimin e mjeteve, shqetësime të tjera ka patur edhe në furnizimin me energji elektrike. Si pasojë e motit të keq, në qarkun e Dibrës, Korçës, Pukës dhe Fushë- Arrëzit është pezulluar mësimi. Edhe në Qarkun e Gjirokastrës në pjesën më të madhe të shkollave dje nuk është zhvilluar mësim. Në qarkun Kukës me përjashtim të pak shkollave në qytet, në të gjitha institucionet e tjera arsimorë nuk është zhvilluar proces mësimor. Burime nga Ministria e Arsimit dje bënë me dije se për shkak të motit të keq, në 16 drejtori dhe Zyra Arsimore mësimi është pezulluar totalisht, në 6 drejtori vetëm disa shkolla janë mbyllur, ndërsa mësimi po zhvillohet me orë të shkurtuar në të gjithë vendin. Ndërkaq, një 53- vjeçar në Shkodër ka humbur jetën, pasi streha e një karburanti është shembur për shkak të shkak të rëndesës së dëborës. Bëhet fjalë për Tonin Locin, punonjës tek karburanti, i cili ndodhej në hyrje të qytetit verior. Pas shembjes ka patur dhe shpërthim zjarri dhe ka qenë e pamundur për punonjësin dalja nga ndërtesa e shembur. Në vendngjarje kanë mbërritur forcat zjarrfikëse dhe policia vendore. Gjithashtu, në vendin e quajtur "Kryqëzimi i fermentimit" është shembur një tjetër karburant, por fatmirësisht nuk ka të lënduar. Pas aksidentit ka reaguar Ministria e Mbrojtjes, e cila iu ka bërë thirrje të gjithë subjekteve dhe banorëve në zonat e prekura nga dëbora që të marrin masa për pastrimin e çative. "Të merren masa të menjëhershme për pastrimin e tyre me qëllim parandalimin e ngjarjeve të tilla tragjike,"- shkruhet në njoftimin e ministrisë së Mbrojtjes.
SITUATA NËPËR QARQE
Mbi 50 centimetra ka arritur trashësia e dëborës në qytetin e Peshkopisë, ndërsa në zonat e thella tashmë ka kaluar një metër, duke izoluar kështu thuajse të gjithë fshatrat. Kjo situatë ka bërë që qarku i Dibrës të ngrejë Shtabin e Emergjencave. Veç rrugëve rurale që janë të gjitha të bllokuara, situata paraqitet problematike edhe në rrugën nacionale Peshkopi- Tiranë e cila është e bllokuar në 2 segmente në Qafën e Ulzës dhe në Bulqizë, nga pishat deri në Qafë të Buallit. Peshkopi - Kala e Dodës Kukës kalohet vetëm me automjete të kalueshmërisë së lartë me zinxhirë
deri në Sllovë, më tej e bllokuar. Trashësia e borës kalon mbi 1 metër dhe është e pamundur sapo kalon borë pastruesja bllokohet për 10 minuta. Gjatë natës, në aksin Peshkopi- Tiranë ka qenë edhe prefekti i Dibrës. Në këtë aks nuk kanë munguar as aksidentet. Probleme ka edhe në aksin Bajram Curri- Valbonë ku ka rënie ortekësh në 2 vende duke bllokuar qarkullimin, dhe po punohet për hapjen e rrugës. I njëjti fenomen ka ndodhur edhe në Qafën e Malit- Fierzë në vendin e quajtur "Arstë" dhe "Porav". Në Shkodër, borëpastrueset po mbajnë hapur rrugët nacionale në territorin e qarkut të Shkodrës. Një borëpastruese po punon gjatë gjithë kohës në aksin Shkodër- Hani i Hotit, reshjet e dëborës janë intensive. Ndërsa vështirësitë më të mëdha janë në rrugët rurale dhe lidhja e tyre me rrugët kryesore. Rrugët lidhëse janë thuajse të pakalueshme. Banorët detyrohen të ecin në këmbë. Reshjet e dëborës në gjithë qarkun e Shkodrës kanë vijuar të bien pa ndërprerje për 24 orë
duke krijuar probleme të mëdha në shumë zona. Gjithashtu, reshjet e dëborës kanë paralizuar qarkullimin në gjithë fshatrat e Pukës, ndërsa kanë shkaktuar vështirësi qarkullimi edhe në akset nacionale.
Reshjet e dëborës janë shoqëruar, gjithashtu, me problematika në qarkun e Kukësit, ndërsa shumë vende të thella malore janë të bllokuara dhe trashësia e dëborës arrin mbi 50 centimetër. Kjo gjithashtu është shoqëruar edhe me mungesë të furnizimit me energji elektrike.
Në Mirditë pjesa më e madhe e fshatrave janë të bllokuara. Rruga e Kombit është e kalueshme me vështirësi pasi reshjet e dëborës janë rikthyer. Ky segment është bllokuar herë pas here për shkak të dëborës në rrugë që solli edhe rrëshqitjen e mjeteve të tonazhit të lartë.
Në Lezhë situata është përmirësuar pas rikthimit të reshjeve të shiut, ndërsa problem mbetet lëvizja drejt zonës së Ungrejit, pasi në zonën e quajtur Kreshtë dëbora ka krijuar vështirësi në qarkullim.
Në jug, situata më problematike paraqitet në qarkun e Gjirokastrës, ku të gjitha fshatrat janë izoluar nga dëbora. Kalimi është i mundur vetëm në rrugët nacionale. Në juglindje bora kalon gjysmë metër. Të gjitha zonat malore në Korçë janë të izoluara. Aksi Korçë- Qafë Thanë- Kapshticë është i kalueshëm normalisht, ndërsa në rrugët e tjera nacionale lëvizet vetëm me zinxhirë. Problematik dhe i rrezikshëm mbetet qarkullimi në rrugën Korçë- Ersekë, në Qafën e Qarrit, ku ka mbi 40 centimetër borë.