Përndjekja, ja si u ekzekutua me dy plumba në kokë 17- vjeçarja Griselda Gjikolaj
Erjon Bengaj: Me autorin u zumë me grushte. Tropojani: Jam çun e mund të ngacmoj çdo vajzë Pak ditë para ngjarjes, viktima i tha të fejuarit se e ngacmonte 19- vjeçari Robert Perpepaj
Dy javë pas ngjarjes së rëndë të ndodhur në zonën e Laprakës, ku mbeti e vrarë 17- vjeçarja Griselda Gjikolaj dhe u plagosu Erjon Bengaj, "Gazeta Shqiptare" ka siguruar dosjen e plotë të prokurorisë në lidhje me krimin që tronditi kryeqytetin. Në këtë dosje jepet dinamika e plotë e ngjarjes që nga përndjekja e vajzës me origjinë nga Kurbneshi i Mirditës nga 19- vjeçari Robert Perpepaj, sherri me Erjon Bengën, mik me të fejuarin e viktimës e deri te përgatitja e atentatit nga autori dhe bashkëpunëtori i tij, Ronald Muzhaqi. Atentat ky i ndodhur mbrëmjen e 26 dhjetorit të vitit që shkoi në vendin e quajtur "Pallatet Gintash" në Laprakë. Referuar dokumentit zyrtar, rezulton se e mitura është qëlluar me dy plumba në kokë nga i dyshuari Robert Perpepaj, i cili prej disa kohësh e përndiqte sistematikisht dhe ishte kthyer në shqetësim për të. Vajza - thuhet në dosje se i ka rrëfyer të fejuarit të saj Samir Hoxha, shqetësimet që po i sillte Roberti duke i kërkuar ta mbronte prej tij. Referuar dosjes, rezulton se 10 ditë përpara ngjarjes, i fejuari i 17- vjeçares dhe shoku i tij Erjon Benga janë konfliktuar me grushte pranë fushës së Laprakës në Tiranë me të shumëkërkuarin 19- vjeçar. Benga i ka kërkuar atij që të mos e ngacmonte Griseldën, por Përpepaj i është përgjigj se "jam çun e mund të ngacmojë çdo vajzë". Në debat e sipër, Erion Benga e ka qëlluar me shpullë të riun me origjinë nga Tropoja. Prej atij momenti, Roberti nuk është bërë i gjallë, deri mbrëmjen e 26 dhjetorit kur edhe ndodhi krimi i rëndë. Dyshimet janë se gjatë ditëve të fundit, ai ka planifikuar të hakmerret jo vetëm ndaj Erjon Bengas, por edhe t'i marrë jetën vajzës, që përndiqte në çdo moment. Pas kryerjes së veprimeve hetimore, pamjeve filmike të siguruara nga kamerat e sigurisë në bizneset afër vendit ku ndodhi vrasja si dhe bazuar në dëshminë e dhënë nga Benga, në dosjen e prokurorisë jepet me detaje se si ndodhi ngjarja.
DËSHMIA E ERJON BENGËS
I pyetur në cilësinë e personit që ka dijeni për hetimi, Erjon Benga ka deklaruar se ditën e ngjarjes, rreth orës 16: 00, ka marrë në telefon shokun e tij Sajmir Hoxha, i cili i ka thënë se është në qendër te lodrat. Sipas deklaruesit, me automjetin e tij tip "Benz Mercedes" me ngjyrë të zezë dhe me targa AA 266 MS ka shkuar në qendër, ka parkuar mjetin dhe më pas është takuar me Saimirin, i cili ishte në shoqërinë e 3- 4 gocave. Pasi janë përshëndetur me vajzat, njërën prej të cilave e ka çuar në Pasku-
qan, janë kthyer më pas në Larakë te lokal "Oblika", ku kanë parkuar makinën në parking dhe më pas janë ulur në lokal. Sipas Bengës, brenda në lokal i prisnin dy shoqet e tyre, e ndjera Griselda Gjikolaj dhe Romina Levanaku. Pasi janë ulur dhe kanë pirë diçka, kanë rënë dakord që të shkonin te puna e Saimirit në Tapizë. Kanë dalë të katërt dhe kanë hipur në makinë, ku në vendin e drejtuesit ka hipur Erjoni, ndërsa Saimiri në vend të parë. E ndjera Griselda prapa tij dhe Romina prapa Saimirit. Sapo kanë ecur rreth 20 metra, përpara tyre kanë dalë dy djem të rij, të cilët kanë gjuajtur me leva dhe në këtë çast i kanë dhënë shpejtësi mjetit. Sipas Erion Bengës, në këtë moment ka parë që personi që ishte në krah të tij, i quajtur Robert Perpepaj ka gjuajtur me pistoletë në drejtim të tij, ndërsa personi tjetër ka gjuajtur me levë në drejtim të vendit ku ishte ulur Saimiri. Në kushtet e mësipërme, Benga e ka shtuar shpejtësinë dhe pasi ka
ndjerë që ishte plagosur është drejtuar me shpejtësi në drejtim të Spitalit të Traumës. Por ende pa mbërritur në duart e mjekëve, Griselda kishte ndërruar jetë. Ndërkohë, që Benga është në gjendje të stabilizuar shëndetësore. Për fat të mirë, ai dhe mikesha e ngushtë e vajzës nuk u prekën nga plumbat.
Skena e krimit që tronditi kryeqytetit funddhjetorin e vitit që sapo lamë pas u rindërtua nga hetuesit, bazuar në rrëfimet e të mbijetuarve të atentatit dhe pamjeve filmike të kamerave të sigurisë së bizneseve të zonës, ku dukej qartë çdo lëvizje e autorëve. Të dyshuarit Robert Perpepaj dhe Ronald Muzhaqi, ndaj të cilëve rëndon akuza e vrasjes në rrethana të tjera cilësuese ndaj dy ose më shumë personave, kryer në bashkëpunim, kanë mundur ta realizojnë planin e tyre kriminal në më pak se dy minuta. Aktualisht, në kuadër të hetimeve të ngjarjes, prokuroria e Tiranës po vijon më pyetjen e familjarëve të viktimës.
VIKTIMA
Në dosjen e prokurorisë thuhet se pas këqyerjes së kufomës së të ndjerës Griselda Gjikola ka rezultuar se në anën e djathtë të kokës janë konstatuar dy plagë në anën e pasme të veshit, në një largësi prej 5 centimetra larg njëra- tjetrës. Nga këqyerja e kufomës, në kokën e së ndjerës janë gjetur dhe janë sekuestruar dy predha, të cilat i janë nënshtruar ekzaminimit teknikbalistik për të përcaktuar llojin, kalibrin dhe modelin.