Tsipras: Krijohet "Shqipëria e Madhe", nëse shpërbëhet Maqedonia
Kryeministri grek: Zgjedhje të parakohshme, nëse Kamenos favorizon kundërshtarin Zoran Zaev: Pse s'rrezikohet identiteti
Kryeministri grek, Alex is Tsipras, ka thënë se dështimi i Marrëveshjes së Prespës dhe një shpërbërje e Maqedonisë mbart rrezikun e krijimit të Shqipërisë së Madhe. Tsipras tha se pakti Athinë- Shkup u shërben interesave të Greqisë. "Greqia nuk ka asnjë interes nga një destabilizim në kufijtë e saj veriorë. Nuk ka asnjë interes të ketë një front të hapur në një vend që do të mund të ishte një hapësirë jetike për ekonominë dhe bizneset tona. Nuk ka asnjë interes nga shpërbërja e atij vendi dhe mundësia e një ' Shqipërie të Madhe' në kufijtë tanë". Në një intervistë për mediat vendase, Tsipras tha se Marrëveshja e Prespës do ta ketë rrugën e hapur në parlamentin grek dhe se ajo është arritja më e rëndësishme e qeverisë së tij pas daljes së vendit nga kriza ekonomike. "Menjëherë pasi të votohet në parlamentin e Shkupit, qëllimi ynë është ta sjellim Marrëveshjen e Prespës në parlament, natyrisht brenda muajit janar". I pyetur rreth një refuzimi të mundshëm të marrëveshjes nga "Grekët e Pavarur" të Panos Kamenosit, kryeministri pohoi se në atë rast do të kërkojë mbështetjen e parlamentit. "Besoj se z. Kamenos nuk do të zgjedhë të favorizojë kundërshtarin tonë. Por nëse e bën, unë do të kërkoj votëbesim nga parlamenti. Nëse nuk marr shumicën prej 151 deputetësh, kemi një problem politik, jo kushtetues dhe atëherë do të thërras zgjedhjet e parakohshme". Marrëveshja historike mes Athinës dhe Shkupit, e firmosur në Prespë në qershor, pritet të ratifikohet brenda 15 janarit në parlamentin e Maqedonisë. Ndërkaq, kryeministri i Maqedonisë, Zoran Zaev ka deklaruar se ende është në bisedime me lëvizjen "Besa" të Bilal Kasamit për gjetjen e formulimit teknik lidhur me shtetësinë, me qëllim të sigurimit të 80 deputetëve të nevojshëm për miratimin e amendamenteve kushtetuese. "' Besa' është parimisht e vendosur për këtë çështje, siç janë edhe të tetë deputetët e VMRO- DPMNEsë dhe koalicionit dhe janë të parët për mbrojtjen e identitetit të Maqedonisë". "Besa" nuk kërkon të ndryshohet identiteti apo ngjashëm. Syri i zgjuar i tetë deputetëve këtë po bën si ne dhe deputetët e tjerë. Po punojmë që të gjendet zgjidhje për formulimet teknike si shtetësia për të gjithë të jetë maqedonas/ qytetarë të Republikës së Maqedonisë Veriore, ndërkaq megjithatë, shqiptarët dhe bashkësitë e tjera etnike të mos jenë maqedonas", tha Zaev në konferencën për shtyp pas promovimit të operatorit të autorizuar ekonomik. Ai shtoi se maqedonasit nuk duhet të frikësohen se ndonjë parti shqiptare apo deputet shqiptar që kërkon të rrezikohet identiteti. "Të gjithë angazhohemi që ai identitet, që ishte kontestuar përfundimisht të jetë i garantuar. Shqiptarët e bënë atë edhe në referendum, edhe me mbështetjen për Marrëveshjen e Prespës, njëkohësisht edhe ne maqedonasit nuk kemi për qëllim që ndonjë ndjenjë apo përkatësi etnike ta ndryshojmë. Ato janë vlera dhe të drejta njerëzore", tha kryeministri. Zaev përsëriti se numri i përgjithshëm i deputetëve, të cilët do t'i mbështesin amendamentet kushtetuese do të dihet në momentin e votimit.