Komisioni Europian do hetojë Kosovën për çmimin e naftës

Autoriteti

Kosovar i Konkurrencës ka njoftuar se javën e ardhshme do të ndihmohet nga ekspertë nga Komisioni Evropian lidhur me pretendimet se në Kosovë është krijuar një kartel i ndërmarrjeve që kanë mbajtur lart çmimin e naftës, shkruajnë mediat kosovare. Valon Prestreshi, drejtor i Autoritetit Kosovar të Konkurrencës, ka thënë se tashmë kanë "të gjitha informatat relevante nga institucionet përkatëse rreth shqetësimeve të ngritura nga qytetarët, mediat dhe shoqëria në përgjithësi rreth pretendimeve të tyre rreth një karteli potencial të ndërmarrjeve, të cilat afrojnë me derivate të naftës". "Këto informata janë duke u përpunuar me shumë kujdes nga hetuesit tanë, bazuar në Ligjin për Mbrojtjen e Konkurrencës, gjithashtu nga java e ardhshme do të marrim ndihmë edhe nga ekspertët e Komisionit Evropian, ku ne si Autoritet jemi përfitues të projektit IPA dhe gjatë javëve në vijim Autoriteti do të dalë me raportin përfundimtar", ka njoftuar ai. AKK po ashtu ka njoftuar për Programin e Lehtësive, Ligjin për Mbrojtjen e Konkurrencës, përkatësisht nenin 60, që parasheh se mund të lirohet ose zvogëlohet masa ndëshkuese e ndërmarrjeve nëse ato: "Me qëllim të zbulimit të shkeljeve më të rënda të këtij ligji, Autoriteti mund të lirojë nga masa ndëshkuese atë pjesëmarrës në marrëveshjet e ndaluara horizontale- kartel, i cili e njofton i pari Autoritetin për kartelin dhe i ofron të dhëna e fakte dhe prova, të cilat i mundësojnë fillimin e procedurës ose pjesëmarrësit të parë në kartelë, që Autoritetit i ofron prova që mundësojnë konstatimin e shkeljes së këtij ligji, në rastet kur Autoriteti ka filluar procedurën, mirëpo nuk ka pasur fakte të mjaftueshme për përfundimin e saj ose konfirmimit të kartelit".