Balla- Metës: S'ju pengojmë dot të jeni Iliri qesharak
"President, ju ftojmë të ruani qetësinë"
Balla, kryetari i grupit parlamentar të PS- së, lëshoi dje akuza të forta ndaj Presidentit Ilir Meta për mos dekretimin e Gent Cakajt si kryediplomat. Në një shënim në ' Facebook', që vjen pas reagimit të Tedi Blushit, këshilltarit të kreut të shtetit, Balla e quan Metën "qesharak". "Zoti President, ne s'ju pengojmë dot të jeni Iliri qesharak që kemi njohur më shumë se sa njëherë kur liderja e LSI ia fut kokën në çizmen e saj! Por këto bumjet tuaja që po e bëjnë edhe Bujar Nishanin të duket si Xhefersoni, nuk impresionojnë dot askënd. Ne s'jemi as PD, as LSI dhe s'kemi ndërmend të humbasim kohë me konflikte të kota me ju", shkruan kreu i deputetëve socialistë. Më tej, Balla shton: "Sepse ju s'keni asnjë shans dhe s'do keni asnjë mundësi të pengoni as punën tonë dhe as Reformën në Drejtësi, që e di Shqipëria dhe bota se sa shumë e dëshironi të realizohet. Por meqë ju kemi dhënë votën si President, ju ftojmë të ruani qetësinë sa të mundeni, sepse duke u bërë ju qesharak, sigurisht edhe ne nuk ndjehemi mirë".