Hahn, Ramës: S'ka të ardhme në BE, pa dialog me opozitën

Komisioneri

i BE- së për Politikat Evropiane të Fqin jësisë dhe Negociatat e Zgjerimit, Johannes Hahn u takua dje në Tiranë me kryeministrin Edi Rama, me të cili diskutoi ecurinë e reformave që lidhen me integrimin në BE dhe zhvillimet e fundit politike në rajon. Komisioneri paralajmëroi kryeministrin se nuk do të ketë integrim të vendit në BE, nëse nuk do të ketë dialog me të gjitha partitë politike në vend. "Angazhimi i fortë në procesin e integrimit në BE nga kryeministri Rama është kyç dhe dialogu konstruktiv politik midis të gjitha partive politike, si dhe gatishmëria për të punuar së bashku në interes të të gjithë qytetarëve shqiptarë është thelbësore për të ardhmen evropiane të Shqipërisë", - citohet z. Hahn në deklaratën për shtyp që publikoi zyra për shtyp e Delegacionit të BE në Tiranë. Z. Hahn po ashtu kërkoi që të ketë një pakt politik mes partive: "Një marrëveshje ndërpartiake për reformën zgjedhore për të trajtuar rekomandimet nga OSBE/ ODIHR do të ishte një mundësi e mirë për ta treguar një gatishmëri të tillë", - deklaroi z. Hahn. Ai i kujtoi z. Rama se 2019- ta është një vit vendimtar për Shqipërinë. "2019- ta është një vit vendimtar për Shqipërinë. Kam besim se qeveria, institucionet dhe të gjitha forcat politike do të vazhdojnë me ritme të rëndësishme në reformat kyçe, përpara vendimit të Këshillit të Europës në qershor, duke realizuar perspektivën e saj evropiane", tha Komisioneri Hahn. Rama dhe Hahn patën mbrëmë një darkë pune, ku në fokus të bisedës së tyre mendohet të ketë qenë reforma zgjedhore, reforma në drejtësi, por edhe kushtet e tjera të vendosura nga BE për integrimin.