Rama si ministër i Jashtëm. Meta: Shmanga krizën institucionale

Presidenti firmos dekretet, shkarkohet Bushati, kryeministri në krye të diplomacisë "Rast i veçantë, s'parashikohet dhe as ndalohet nga Kushtetuta"

Presidenti i Republikës, Ilir Meta dekretoi dje kryeministrin Edi Rama edhe në postin e ministrit për Europën dhe Punët e Jashtme, pas shkarkimit të Ditmir Bushatit, që ka mbajtur këtë detyrë deri tani. Debatit të krijuar në ditët e fundit nëse e lejon Kushtetuta që kryeministri të mbajë edhe postin e ministrit, kreu i shtetit i përgjigjet duke sqaruar se, "është një rast i veçantë, që nuk parashikohet dhe as ndalohet nga Kushtetuta e Republikës së Shqipërisë". Në njoftimin e shpërndarë për mediat, zyra e shtypit të Presidentit thekson se dekreti është firmosur nga Meta "duke mbajtur në konsideratë edhe rëndësinë e evitimit të çdo mundësie për krijimin e një krize institucionale, e cila do të dëmtonte pozitën e Republikës së Shqipërisë në marrëdhëniet ndërkombëtare". Megjithatë, kreu i shtetit thekson se, "ushtrimi i detyrës së ministrit nga kryeministri është një veprimtari shtetërore, që shtrihet brenda sferës ekzekutive, pjesë e kabinetit qeveritar, struktura e të cilit është në të drejtën e kryeministrit për t'u propozuar". Meta shprehet se emërimi i Ramës në krye të diplomacisë është një rast i veçantë, por që nuk përbën shkelje të Kushtetutës. "Emërimi i kryeministrit edhe në detyrën e ministrit është një rast i veçantë, që nuk parashikohet dhe as ndalohet nga Kushtetuta e Republikës së Shqipërisë. Në shqyrtimin e këtij propozimi, Presidenti i Republikës, në cilësinë e kreut të shtetit, ka mbajtur në konsideratë edhe rëndësinë e evitimit të çdo mundësie për krijimin e një krize institucionale, e cila do të dëmtonte pozitën e Republikës së Shqipërisë në marrëdhëniet ndërkombëtare. Presidenti i Republikës, në mbështetje të nenit 93 dhe 98 pika 1 të Kushtetutës, sot më datë 18.01.2019, ka vendosur me dekret që: Z. Ditmir Bushati, ministër për Evropën dhe Punët e Jashtme, shkarkohet nga kjo detyrë dhe zoti Edi Rama, kryeministër, emërohet edhe ministër për Evropën dhe Punët e Jashtme", thuhet në njoftimin e

presidencës. Me dekretin e djeshëm merr fund, të paktën për momentin, përplasja institucionale mes Presidencës dhe qeverisë, e cila nisi pas refuzimit që Meta i bëri emrit të Gent Cakajt në postin e ministrit të Jashtëm. Kryeministri ka parala-

jmëruar se çështjen nëse Presidenti ka të drejtë që të kthejë dekretet do ta dërgojë në Gjykatën Kushtetuese. Tashmë pritet që në seancën e radhës, që është në datë 21 janar të firmosen dekretet e shkarkimit të Bushatit dhe të emërimit të kryeministrit

Edi Rama edhe në postin e kryediplomatit të Shqipërisë. Kryeministri Edi Rama ka paralajmëruar se do përballet me Metën në Kushtetuese, pas vendimit të këtij të fundit për të mos dekretuar Gent Cakajn si ministër të Jashtëm.