Rama, pedagogëve: Merrni përgjegjësitë, problemi nuk janë studentët, por ju
Qeveria e re prezantoi Paktin për Universitetin para pedagogëve dhe studentëve "Peng qeverinë s'mund ta merrni dot duke bërë presione"
Me prezencën edhe të ministrave të rinj që sapo kanë marrë detyrën, qeveria ka prezantuar përpara një përfaqësie studentësh, pedagogësh dhe dekanësh e rektorësh draftin e Paktit për Universitetet. Nën drejtimin e ministres së re për Arsimin, Besa Shahini është bërë detajimi i dokumentit që sipas qeverisë shtron zgjidhje për çdonjërën nga 8 pikat e studentëve, por siç ka deklaruar kryeministri më parë, shkon përtej tyre, duke tentuar të trajtojë edhe një sërë çështjesh të tjera, që shqetësojnë sot arsimin e lartë në vend. Në fjalën e tij para studentëve dhe pedagogëve, kreu i qeverisë ka qenë i ashpër kryesisht me stafin akademik dhe drejtuesit e universiteteve, të cilët sipas tij, ndryshe nga qeveria që e ka pranuar përgjegjësinë e saj, nuk kanë reflektuar aspak në lidhje me pjesën që ata vetë duhet të bëjnë. "Nga ligji ju kërkoni liri, por nuk doni të merrni përgjegjësi. Ligji i arsimit të lartë ju jep liri, ju jep edhe përgjegjësi. Merreni përgjegjësinë dhe na thoni çfarë doni nga ne. Ne dimë çfarë duan studentët dhe do t'i bëjmë një për një. Se çfarë doni ju, ne nuk e kemi kuptuar, ose më saktë unë e kam kuptuar, por nuk kam ndërmend ta them akoma", - tha kryeministri në fjalën e tij. Ai shkoi edhe më tej, duke u bërë të qartë pedagogëve dhe drejtuesve të universiteteve se nëse nuk reagojnë për të marrë përgjegjësitë që u takojnë, atëherë ai do bëhej me studentët për të luftuar kundër tyre. "Mos prisni ditën kur do bashkohem unë me studentët dhe të vij përballësh jush dhe t'u them studentëve se çfarë në fakt ju nuk doni. Ju bëhuni bashkë tani dhe ndajeni këtë punë. Do të mbarojë historia e doktorëve të shkencave që vetëm me shkencë nuk kanë lidhje apo nuk do mbarojë? Ju e dini shumë mirë për çfarë flas unë dhe e dinë shumë mirë sot se çfarë po ndodh. Nuk janë ata grupet e studentëve të ngujuar, problemi janë pedagogët që nuk shkojnë t'u japin mësim. Pse nuk shkojnë t'u japin mësim? Një student i vetëm ka të
PRESIONI
"Peng qeverinë s'mund të merrni dot duke bërë presione, duke u fshehur, duke mos bërë mësim. Unë për veten time këtë protestë nuk e lë sikur të ngelem vetëm. Jam i gatshëm t'i mbaj të gjitha përgjegjësitë, edhe për borën që bie, por për budalla mua njeri dot nuk më bën".