Zgjedhjet vendore, kandidatët potencial të PS për bashkitë kryesore
Veliaj, Çela, Mesi, Llatja, Ndreu, Subashi, disa nga emrat që do përfaqësojnë PS- në Qazim Sejdini dhe Vangjush Dako pritet të mos kandidojnë
Gati 5 muaj nga zgjedhjet për push tetin vendor, partitë kryesore politike, ndonëse kanë nisur organizimet e strukturave, nuk kanë bërë ende përzgjedhjen përfundimtare të kandidatëve për kryetar bashkie. Ndërsa në kampin opozitar çështja mbetet tek arritja e një marrëveshje mes dy forcave kryesore të këtij blloku, PD- LSI, socialistët nga ana tjetër, për shkak edhe të një taktike elektorale, kanë hezituar deri më tani që të bëjnë publik emrat me të cilët do përfaqësohen në zgjedhjet e ardhshme lokale. Zyrtarisht deri më tani është deklaruar se kjo do të vendoset nga strukturat partiake, pas një analize që do ti bëhet punës së kryebashkiakëve aktual, por edhe testimit të mbështetjes së kandidatëve potencial në sondazhet e brendshme. Gjithsesi për një pjesë të mirë të bashkive kryesore në vend situata duket më e qartë dhe në korridoret e PS kanë nisur të qarkullojnë emrat potencial me të cilët socialistët do të konkurrojnë për të fituar zgjedhjet e ardhshme vendore.
TIRANA
Kryeqyteti padyshim do të përbëjë dhe garën më të rëndësishme elektorale, jo vetëm për shkak se përfshin gati 1/ 3 e popullsisë së gjithë Shqipërisë, por edhe rëndësisë që merr në debatin politikë fitorja ose humbja e kësaj bashkie. Kështu nga njëra anë demokratët kanë hedhur në debat publik disa kandidatura, ku më e favorizuara deri më tani duket Jorida Tabaku, e cila në zgjedhjet e fundit për strukturat e reja arriti të ishte e vetmja kandidate femër që u zgjodh me vota direkte anëtare kryesie. Ndërkohë që në kampin socialistë dilemat janë më të pakta në këtë drejtim, pasi rikandidimi i Veliajt është thuajse një gjë e sigurtë. Vetë kryeministri Edi Rama duke folur dy ditë më parë në prezantimin e projektit të kampusit universitar, u shpreh se ai do të përfundojë brenda mandatit tjetër të kryetarit të bashkisë, duke konfirmuar në një farë mënyre se Veliaj do jetë edhe për një mandat tjetër kryetar i Bashkisë së Tiranës. Gjithsesi në media ka qarkulluar edhe emri i ministres së Shëndetësisë, Ogerta Manastirliu.
DURRËSI
Ndërkohë që interesante paraqitet gara edhe për bashkinë e dytë më të rëndësishme në vend, atë të Durrësit. Në kampin e djathtë deri më tani flitet për dy kandidatë të mundshëm, deputeti Oerd Bylykbashi dhe ish- kryetari i FRD- së, Gazmend Oketa, i rikthyer së fundmi në PD. Ndërkohë që në kampin e majtë duke thuajse i sigurt kandidimi i kryetarit aktual, Vangjysh Dako, kjo jo vetëm për shkak të numrit të madh të mandateve që ai e drejton këtë bashki, por më së shumti edhe për përfshirjen në përgjimet që e lidhin me disa element kriminal nga Shijaku. Vetë Dako disa muaj më parë do të deklaronte se e shihte veten jashtë garës. "Nuk ndjehem i lodhur, por e shoh veten në një pozicion tjetër. Por një gjë është e sigurt, që unë do të drejtoj fushatën për të gjithë qarkun", - deklaroi atëherë Dako. Për zëvendësimin e tij, burime nga PS bëjnë të sigurt kandidimin e kreut të OSHEE- së, Adrian Çela. Çela konsiderohet nga socialistët si një nga drejtorët më të suksesshëm të qeverisjes së tyre, ndërkohë që ka një favor të madh në këtë kandidim sepse e njeh mirë pushtetin vendor dhe Bashkinë e Durrësit, pasi më parë ka qenë nënkryetar i saj.
KANDIDATËT E TJERË
Burime nga Partia Socialiste e quajnë të larguar Qazim Sejdinin, i cili ka tashmë disa mandate në krye të Bashkisë së Elbasanit dhe konsiderohet si një emër i konsumuar tashmë. Në vend të tij burime pranë PS- së kanë bërë të sigurt kandidimin e Gledian Llatjas. Llatja ka qenë shefi i kabinetit të Damian Gjiknuri, ndërsa prej një jave ai është emëruar si Prefekt i Elbasanit. Kjo si një mënyrë edhe për të njohur terrenin ku do të kandidojë, por edhe për tu promovuar te votuesit elbansalli. Ndërkohë që një garë interesante pritet edhe në kryeqendrën e veriut, Shkodrën. Ndërsa demokratët pritet të rikandidojnë sërish Voltana Ademin, socialistët pritet t'i përgjigjen atyre në këtë garë po me një kandidate femër. Burime nga PS konfirmojnë se ajo do jetë, ish- zëvendëskryeministrja Senida Mesi. Ndërkohë në Fier pritet të rikandidojë Armando Subashi, në Lezhë pritet të kandidojë Pjerin Ndreu, në Vlorë Dritan Leli, në Gjirokastër Flamur Golemi, në Malësi të Madhe Tonin Marinaj, në Librazhd Kastriot Gurra, në Korçë pritet të rikthehet Niko Peleshi, në Berat Ervin Dema dhe në Lushnje Tatjana Pirro.