Meta: Durrësi xhevahir i historisë, mbrojtja e tij prioritet madhor
Presidenti i Republikës, Ilir Meta priti në një takim kryesinë e shoqatës "Durrësi" të përfaqësuar nga intelektualët Shpëtim Metani, Lumturi Ngjala, Agim Shehi, Rifat Bilali dhe Gjon Huli. Pasi u njoh me aktivitetin e kësaj shoqate, Presidenti Meta vlerësoi lart kontributin e saj për mbrojtjen dhe promovimin e vlerave qytetare e patriotike, trashëgimisë së pasur historike, arkeologjike dhe kulturore të kësaj treve. "Durrësi është një xhevahir i çmuar i historisë së Shqipërisë, për vlerat e spikatura patriotike, intelektuale, artistike e kulturore, si vatër e rëndësishme e atdhedashurisë dhe dijes nga ku kanë dalë personalitete të shquara në të gjitha fushat. Por veçanërisht për trashëgiminë e pasur, autentike dhe të jashtëzakonshme arkeologjike, që e dallon nga trevat e tjera duke e kthyer në një atraksion të rëndësishëm turistik. Mbrojtja dhe promovimi i këtyre vlerave që na bëjnë krenarë si shqiptarë duhet të jetë një prioritet madhor për të gjithë ne", - tha Meta. Gjithashtu, Meta zhvilloi një bisedë miqësore me personalitete të shquara drejtuese të klubit patriotik "Bashkësia dibrane", ku morën pjesë kompozitori i mirënjohur dhe "Nderi i Kombit", Agim Krajka dhe Mjeshtri i Madh, Bujar Kapexhiu. Presidenti Meta duke çmuar lart komunitetin dibranë, cilësitë e spikatura njerëzore, atdhedashurinë dhe kontributin e madh të brezave të tërë të kësaj treve për pavarësinë dhe forcimin e identitetit kombëtar, vlerësoi rolin e kësaj shoqate për ruajtjen e promovimin e vlerave të trashëgimisë së pasur historike e kulturore të Dibrës.