Hapet sot sesioni parlamentar, votohet Rama si ministër i Jashtëm
Opozita pritet të jetë e pranishme në sallë sot kur të votohen dekretet e Metës Nesër Rama duhet të shkojë në Presidencë për t'u betuar
Nis sot sesioni i katërt i Legjislaturës së nëntë të Kuvendit të Shqipërisë. Por seanca e sotme nuk do jetë vetëm ceremoniale, pasi në të pritet të votohen edhe dy dekretet e fundit të Presidentit Ilir Meta për të kompletuar kështu ndryshimet në qeveri. Kështu, në seancën e sotme do të votohet dekreti për shkarkimin e Ditmir Bushatit nga detyra e ministrit të Jashtëm si dhe dekreti tjetër, ai për emërimin në vend të tij të Edi Ramës si shef i diplomacisë shqiptare. Nisur nga fakti se në këtë seancë do jetë edhe votimi i dekretit për emërimin e Edi Ramës si ministër i Jashtëm, burime nga opozita kanë bërë me dije se ajo do jetë sot e pranishme në sallë. Gjithsesi, para seancës pritet të zhvillohet edhe një mbledhje e grupit parlamentar, ku pritet të merret edhe vendimi final për këtë seancë. Ndërkohë që menjëherë pas votimit të sotëm, kryeministri Edi Rama do i duhet që të paraqitet në Presidencë për t'u betuar para Metës për marrjen e detyrës së re. Ndonëse bëhet fjalë për një akt formal procedural, ky do jetë momenti i parë i ballafaqimit të Ramës me Metën, pas akuzave e kundërakuzave që kanë shkëmbyer gjatë javëve të fundit lidhur me debatin për dekretimin e ministrave.
REFORMA
Veç votimit të dekreteve Kuvendi do të votojë edhe kalendarin e punimeve, ndërsa deputetët do të njihen edhe me projektligjet e depozituara. Një nga sfidat e kësaj legjislature do jetë padyshim miratimi i reformës zgjedhore, megjithëse tashmë gjasat që kjo gjë të realizohet janë të pakta. Socialistët kanë depozituar në Kuvend një projektligj të plotë për të amenduar Kodin Zgjedhor, por ai nuk ka ardhur si produkt i një diskutimi të gjithanshëm, por si propozim i njëanshëm i deputetëve të PS- së. Ndaj opozita e ka kundërshtuar atë draft si të papranueshëm, ndërsa në mbledhjen e fundit të Konferencës së Kryetarëve ajo kërkoi me forcë që të shtyhet edhe një herë afati i komisionit të posaçëm të reformës zgjedhore. Kërkesë
kjo që u refuzua nga socialistët, të cilët bën të ditur se nuk mund të shtyhet afati i një komisioni që i ka mbaruar mandati prej një kohe të gjatë. Gjithsesi kryeparlamentari Gramoz Ruçi u shpreh të premten e shkuar se drafti i paraqitur nga socialistët nuk mund të hyjë në procedurë parlamentare, nëse më parë