Apeli i Krimeve të Rënda lë në burg 2 anëtarët e bandës së Shijakut

TIRANË - Hajri Seferi dhe Hekuran Hoxha, të cilët u arrestuan gjatë operacionit të koduar "Volvo 4" si anëtarë të bandës së Shijakut, dje u lanë në burg nga Gjykata e Apelit të Krimeve të Rënda. Mësohet se gjykata ka refuzuar kërkesën për lirimin e tyre me argumentin se prokuroria ka prova për të vazhduar hetimet ndaj tyre për trafik narkotikësh, grup kriminal dhe pastrim parash. Me argumentin se Hekuran Hoxha, i njohur si "Roni" ka probleme shëndetësore është kërkuar liria nga avokati i tij. Hoxha u arrestua pak ditë më parë si personi që do trafikonte drogën që do të prodhohej në laboratorin e Hasit. Ndërsa, Hajri Seferi dyshohet të jetë një prej krerëve të grupit Avdylajve. Ai është një nga personat që është përgjuar më shumë dhe që çoi në shkatërrimin e katër grupeve kriminale. Në dosjen e prokurorisë thuhet se Seferi ishte urë lidhëse mes tyre.