Zjarri te kulla e Sahatit në kryeqytet, konflikt për truallin e kullës 77 metër

TIRANË - Policia ende nuk ka një version të saktë mbi zjarrin e rënë pasditen e së enjtes zonën pas kullës së sahatit në Tiranë. Flakët përfshinë godina njëkatëshe, të cilat prej disa ditësh janë rrethuar me mure metalikë. Pikëpyetjet ngrihen rreth faktit sesi mund të përfshihej nga flakët një objekt ku nuk ushtrohej asnjë lloj aktiviteti. Ndërsa, mësohet se në këtë vend është parashikuar të ndërtohet një godinë 77 m e lartë. Por ngjarja ka nxjerrë në pah edhe një konflikt pronësie midis pronarëve të kafes së famshme të Tiranës, "Bar Sahatit" dhe disa personave që zotërojnë pronësinë e truallit dhe Bashkisë Tiranë. Pronarët e "Bar Sahatit", Dashnor e Flutura Doçi thanë dje për "News 24" se lokalin e kanë privatizuar në ' 91- in dhe në vitin 1995 kanë blerë truallin nga bashkia. Ata pohuan se deri në vitin 2018 kanë punuar normalisht, derisa hipoteka i ka lajmëruar se prona e tyre ka mbivendosje. Ndërkaq, dje IMT ka shkuar për t'i prishur objektin pa urdhër prishjeje dhe pa lajmërim me arsyetimin se aty është dhënë leje zhvillimore.