PD pyet Gjonajn: Trego kë shantazhoi Dritan Dajti?

Pas

marrjes së vendimit për Dritan Dajtin për uljen e dënimit nga burgim i përjetshëm në 25 vite burg për vrasjen e katër policëve në 2009, PD i kërkoi kryeministrit Rama dhe ministres së Drejtësisë, Gjonaj që t'u përgjigjet disa pyetjeve, të cilat po mbahen të fshehta për opinionin publik. Në pyetjet e drejtuara ministres së Drejtësisë kërkohet shpjegim se më kë ka komunikuar nga burgu Dritan Dajti si dhe kush dha garancinë për lirimin e tij. "Qeveria vazhdoi talljen e pacipë dhe të pamëshirshme me 4 Dëshmorët e Atdheut, të vrarë në krye të detyrës nga krimineli Dritan Dajti, për t'u hedhur hi syve shqiptarëve dhe partnerëve ndërkombëtarë, se vendimi në favor të Dritan Dajtit është prodhim i Edi Ramës.

Kërkesa e Ministres së Drejtësisë për procedim disiplinor të gjyqtarëve, në kushtet kur mungon ligji për shkeljen disiplinore, është tallje me shqiptarët dhe një teatër kriminal që nuk ndryshon dot faktin se një tjetër kriminel i rrezikshëm u lirua nga drejtësia e reformuar e Edi Ramës. Në vend të propagandës së neveritshme dhe mashtrimit të pacipë të opinionit publik, ministrja e Drejtësisë ka për detyrë të mos heshtë, por t'u thotë shqiptarëve: Me kë komunikon nga burgu Dritan Dajti? Kë shantazhon nga burgu vrasësi i 4 policëve në krye të detyrës? Kush i ka dalë Dritan Dajtit garant për lirimin e tij të shpejtë? Pyetjet janë konkrete dhe kërkojnë përgjigje konkrete dhe ministrja e Drejtësisë nuk mund të fshihet dot shumë gjatë pas kërkesave që bazohen në ligje që nuk ekzistojnë",thuhet në deklaratën e PD- së.

TAKIMI

Ambasadori i BE, Luigi Soreca, takoi dje kreun e Këshillit të Emërimeve në Drejtësi, Ardian Dvoranin duke i shprehur mbështetjen e Bashkimi Europian për punën e rëndësishme të Këshillit.