Dhunohet infeksionisti në krye të detyrës, mjekët protestojnë para QSUT
Ministrja e Shëndetësisë: Barbari të sulmosh profesionistët. Ndryshim në Kodin Penal Nënshkruhet peticioni për kushte të sigurta në punë
Mesditën e së dielës, mjeku infeksionist Gentian Stroni është dhunuar nga të afërmit e një pacienti brenda urgjencës së Shërbimit të Sëmundjeve Infektive në QSUT. Mjeku në momentin që është sulmuar, ishte në krye të detyrës duke i shërbyer një tjetër pacienti. Agresori ka kërkuar që t'i bëhet një vaksinë të afërmit të tij, pavarësisht se kjo nuk ishte në kompetencë të spitalit, madje insistonte që ta merrte shërbimin menjëherë.
PROTESTA E MJEKËVE
Një ditë pas ngjarjes, mjekët e infektivit, kanë dalë në protestë dhe kanë kërkuar nga administrata e QSUT- të si dhe nga Ministria e Shëndetësisë që t'u sigurohen kushte në punë dhe mbrojtje. Mjekët kanë kërkuar edhe rishikimin e akteve nënligjore për të minimizuar kështu dhunën ndaj bluzave të bardha. Më tej mjekët, kanë nënshkruar një peticion drejtuar MSHMS, QSUT- së dhe Urdhrit të Mjekut të Shqipërisë ku kanë parashtruar kërkesat e sipërpërmendura. "Në emër të gjithë pjesëtarëve të kolektivit të Shërbimit Infektiv dhe Shoqatës Shqiptare të Infektivologjisë, ne dënojmë njëzëri dhe fuqishëm këtë akt të paprecedent dhune ndaj një pjesëtari dhe anëtari të nderuar të tij që ishte në krye të detyrë duke i shërbyer pacientëve. Çdo sulm ndaj personelit mjekësor në kushtet e punës duhet të trajtohet me shumë seriozitet nga të gjitha palët e interesuara",thuhet në peticion. Në këtë të fundit i kërkohet organeve kompetente të zbatimit të ligjit që të vënë para përgjegjësisë ligjore agresorin dhe dënimin e tij sipas kërkesave të Kodit Penal për goditjen për shkak të detyrës. Mjekët i kërkojnë, gjithashtu, administratës së QSUT- së dhe Ministrisë së Shëndetësisë, të bëjnë të mundur që gjithë personeli mjekësor i Shërbimit Infektiv dhe sidomos ai i Urgjencës, të ketë një ambient pune të qetë dhe të sigurtë, çka mund të arrihet me roje të sigurisë me kompetenca dhe aftësi profesionale që të parandalojnë dhe minimizojnë akte të tilla. Mjekët kanë bërë thirrje edhe për shtim të personelit. "Kërkojmë shtim të personelit që punon pranë urgjencës, mjekë dhe infermierë, sidomos ata që duhet të merren me triazhin e pacientëve. Urgjenca e shërbimit infektiv, sidomos në periudha ngarkesash si kjo e tanishmja e gripit sezonal, përballet me një numër dhe fluks të shtuar pacientësh që kalon disa herë normat e njohura ndërkombëtarisht. Ngarkesë e tillë e vendos personelin mjekësor para një presioni të shtuar të pacientëve dhe familjarëve që paraqiten me problematika mjekësore urgjente dhe jourgjente dhe që shpesh kanë pritshmëri për shërbim mjekësor që nuk i përgjigjet problematikës mjekësore që
PROTESTA
Një ditë pas ngjarjes, mjekët e Infektivit kanë dalë në protestë dhe kanë kërkuar nga administrata e QSUT- të si dhe nga Ministria e Shëndetësisë që t'u sigurohen kushte në punë dhe mbrojtje. Mjekët kanë kërkuar edhe rishikimin e akteve nënligjore për të minimizuar kështu dhunën ndaj bluzave të bardha.
paraqesin",- theksohet në peticion.
REAGIMI I MINISTRES
Ministrja e Shëndetësisë Ogerta Manastirliu e ka cilësuar si barbarizëm sulmin ndaj mjekut Gentian Stroni dhe ka propozuar një ndryshim në kodin penal, për të konsideruar kanosjen dhe goditjen ndaj bluzave të bardha, si vepër penale, me dënim të rëndë. "Dënoj me forcë aktin e neveritshëm, të agresionit të dhunshëm ndaj mjekut infeksionist G. S. Eshtë barbari të sulmosh një profesionist të shëndetit, për më tepër në kushtet kur është duke ofruar me përkushtim dhe profesionalizëm, shërbim shëndetësor për qytetarët. Akte të tilla nuk mund të tolerohen, ndaj kam propozuar një ndryshim në kodin penal, për të konsideruar kanosjen dhe goditjen ndaj bluzave të bardha, si vepër penale, me dënim të rëndë",- tha Manastirliu.