Berisha: Terror administratës. Braçe: Kërkova të bëhet puna
Ish-
kryeministri Sali Berisha publikoi dje mesazhin e një qytetari dixhital, sipas të cilit zv. kryeministri Erjon Braçe ka ushtruar terror në zyrat e administratës në Fier. "Ka më shumë se një javë që në zyrat e institucioneve në Fier vjen dhe bën inspektim vetë Erjon Braçe, duke bërë ' show' se gjasme të rritet aftësia në shërbimet publike në administratë, por tjetër gjë luhet. Nga Tirana sot ( dje) vjen një email nëpër drejtoritë e kuadrit, ku kërkohen të gjitha dosjet e nëpunësve të administratës në Fier, në të gjitha drejtoritë rajonale, kjo për arsye të verifikimit për çdo punonjës se kur ka hyrë në administratë, kush e ka sjell mik i kujt është dhe kujt force politike i takon, pra qëllimi i këtij inspektimi i Braçes është selektimi i atyre që kanë ngelur dhe zëvendësimi i tyre me militantët e fushatës elektorale që vjen në qershor dhe vijnë e na nxjerrin propaganda politike për emërime mbi bazë meritokracie të rastit të asaj vajzës që me demek ishte ekselente", - thuhet në denoncim. Por z. Braçe iu përgjigj ish- kryeministrit duke thënë se ka filluar të shkojë zyrë më zyrë duke kërkuar të bëhet punë. E gjitha kjo, sipas tij ka një qëllim, shërbimin ndaj qytetarit. "Ky nuk është terror, kjo është përgjegjshmëri ndaj detyrës dhe shërbimit publik ndaj qytetarit. Vertikalisht, nga unë deri tek i fundit nëpunës që paguhet nga taksat e qytetarëve. Ti Sali Berisha nuk hyn këtu. Ti ke gjithë të drejtën të jesh i papërgjegjshëm!", shprehet z. Braçe.