Protesta para Kryeministrisë, Basha: Na ndihmoni të hapim atë derë
Kreu i PD- së fton qytetarët e Burrelit: 16 shkurti, referendumi më i madh popullor "Pas gardhit të policëve është hajduti"
Kreu i opozitës, Lulzim Basha ishte dje në Burrel në takim me simpatizantët demokratë dhe qytetarët, të cilët i ftoi që të merrnin pjesë në protestën e 16 shkurtit para Kryeministrisë. Z. Basha paralajmëroi se qëndresa do të vazhdojë deri në largimin e Ramës nga qeveria. "Falë bashkimit tuaj, i cili do të jetë më i madhi që ka dëshmuar populli shqiptar, një standard i ri evropian do të vendoset. Çdo qeveri që vjen pas datës 16 do t'i bëjë llogaritë me popullin. Siç jeni mbledhur sot, ( dje) siç u mblodhët në protestën madhështore para ditë ditësh, ashtu të bashkuar të derdheni në Tiranë, me drejtësinë e kauzës popullore në zemër dhe me vendosmërinë për të mos u larguar pa shembur sistemin e kalbur që po ju varfëron dhe vjedh ditë për ditë. Le të vërshojë sovrani në rrugët dhe sheshet e Tiranës, të shtunën në orën 11 në referendumin më të madh popullor që do t'i japë fund kësaj qeverie bandite. Është një bashkim europian dhe kushtetues, për t'i dhënë fund njëherë e mirë, këtij sistemi të kalbur që është vetëm një grup njerëzish", deklaroi z. Basha. Gjatë takimeve kreu i PD- së theksoi se familjet shqiptare po varfërohen nga politikat e ndjekura prej qeverisë "Rama". Ai akuzoi se qeveria qëndron në pushtet me paratë e krimit. "Me 16 shkurt do t'i japim fund kësaj qeverie bandite. 16 shkurti është bashkimi popullor kundër vjedhjes, hajduteve të Shqipërisë, kundër vjedhjes së zgjedhjeve dhe të ardhmes se shqiptareve",- deklaroi kreu i opozitës. Referuar kordonit të policisë që do të jetë para Kryeministrisë në protestën e së shtunës, lideri demokrat tha se matanë tij janë hajdutët, ndërsa përballë kanë popullin. Ndonëse në pushtet Basha tha se do të vijë përmes votës së lirë, shqiptarët i ftoi të bëjnë rezistencë deri në rrëzimin e qeverisë. "PD do vijë në pushtet me votë. Të shtunën në anën tjetër të gardhit të policisë është kryehajduti që është kapur duke vjedhur paratë tuaja, votat tuaja… ndaj të shtunën bota do ta shohë se ku e ka katandisur shtetin
FTESA
"Ju ftoj të gjithëve më 16 shkurt, nga gardhi matanë policëve është hajduti, ndërsa pjesa këtej është pala e vjedhur. Na ndihmoni të hapim atë derë. Të bashkohemi të gjithë për Shqipërinë si gjithë Evropa. Hajdutët duhet të shkojnë në burg. Ky është thelbi i ditës së shtunë", - theksoi z. Basha.