Tokë me 7501, për 6 muaj do të pajisen me tapi 200 mijë pronarë
Komisioni i Veprimtarisë Prodhuese miraton draftin për regjistrimin e tokës bujqësore Nisma e Braçes për të lehtësuar 9 mijë familje fermerësh
Personat që kanë për fituar tokë bujqësore me ligjin 7501 do të pajisen me certifikatë pronësie brenda 6 muajve nga miratimi në parlament i ndryshimeve ligjore që kaluan dje "testin" e deputetëve në Komisionin e Veprimtarisë Prodhuese. Kur kanë kaluar më shumë se 25 vite që kur u shpërndanë tokat me ligjin 7501 dhe atë për ndarjen e tokës së ish- ndërmarrjeve bujqësore, gjysma e titujve të pronësisë nuk janë të regjistruar në hipotekë. "Janë 400 mijë akte të marrjes së tokës në pronësi dhënë fermerëve. Të regjistruar në Zyrën e Regjistrimi të Pasurive të Paluajtshme janë rreth 50% e tyre", tha Ermira Gjeçi, zv. ministre Bujqësisë. Ndërkohë, rreth 9 mijë fermerë të tjerë kanë probleme për të marrë aktin e tokës në përdorim. Për t'i dhënë zgjidhje një pjesë të problematikës, mazhoranca miratoi në Komisionin e Veprimtarive Prodhuese dy projektligje të propozuara nga deputeti Erion Braçe, që lehtësojnë marrjen e dokumentacionit për familjet që nuk pajisen dot me aktin e marrjen së tokës në përdorim. Por, për ish- ministrin e Bujqësisë, Edmond Panariti, çështja duhet trajtuar me kujdes dhe nisma të jetë e mirëmenduar, pasi mund të lindin konflikte. "Bëni shumë kujdes, mos fusni duart në një proces, i cili mund të gjererojë konflikte të panumërta, mund të krijojë konflikte sociale dhe mos e çoni procesin në mënyrë të sforcuar kur ai vuan nga parregullsi", tha Panariti, deputet LSI. Në thelb dy ligjet lejojnë ata fermerë që janë shpërngulur në vitet ' 90 nga një vendbanim në tjetrin pa u regjistruar në zyrat e gjendjes civile të marrin aktet e tokës në përdorim. Po ashtu, verifikimi i titujve të tokës bujqësore u shty deri në fund të 2019ës.
AMTP
Në relacionin e projektligjit mësohen edhe dhënat në të gjithë procesin. "Lidhur me procesin e pajisjes me AMTP për periudhën 1991 deri 15 gusht 2008 janë dhënë 43 1898 AMTP. Janë në proces të plotësimit 7310 AMTP, të cilëve i korrespondon një sipërfaqe prej 3471 ha, ndërkohë që janë plotësuar 4123 AMTP, të cilëve i korrespondon një sipërfaqe prej 1407 ha. Lidhur me procesin e regjistrimit të AMTP- ve janë regjistruar afërsisht 250.000 AMTP. Në lidhje me procesin e verifikimit të AMTP- ve nga 23520 kërkesa për verifikim gjithsej, janë 4432 vendime të mara, si dhe 12.069 përgjigje administrative për kërkesat e paraqitura. Lidhur me procesin e legalizimeve, nga 227.000 objekte të legalizueshme, deri në nëntor 2018 janë legali-
zuar 164.866 objekte. Në lidhje me kalimin në pronësi të oborreve në përdorim janë paraqitur rreth 2500 kërkesa nga të cilat janë dhënë 1429 vendime. Janë për t'u shqyrtuar dhe për të marrë vendim 848 dosje", - thuhet në relacionin që shoqëron ndryshimet ligjore.
AFATET
Projektligji i ri përcakton se njësitë e vetëqeverisjes vendore brenda 3 muajve
nga hyrja në fuqi e ligjit përcjellin pranë ASHK kërkesat për kalimin në pronësi të tokës bujqësore, të administruara sipas ligjeve nr. 171/ 2014 "Për përfundimin e procedurave ligjore të kalimit të tokës bujqësore të ish- ndërmarrjeve bujqësore në pronësisë të përfituesve" dhe nr. 9948, 7.7.2008 "Për shqyrtimin e vlefshmërisë ligjore të krijimit të titujve të pronësisë
mbi tokën bujqësore", përpara hyrjes në fuqi të këtij ligji. Gjithashtu, njësitë e vetëqeverisjes vendore brenda 6 muajsh nga hyrja në fuqi e ligjit duhet të evidentojnë edhe përdorues të tjerë faktikë, të cilët nuk kanë paraqitur kërkesë si më sipër, si dhe ata të cilët kërkesa u është refuzuar në bazë të ligjeve sa më sipër, por plotësojnë kriteret e përcaktuara në këtë ligj.
ÇFARË PËRFITOJNË PERSONAT QË KANË MARRË TOKË ME 7501
Ligjësimin e akteve të marrjes në pronësi të tokës bujqësore.
Kalimin në pronësi pa shpërblim të tokës bujqësore, tek subjektet që e kanë atë në përdorim dhe janë përfshirë në procesin administrativ nëpërmjet kërkesës apo që kanë një titull përdorimi.
Rregullimin ligjor, me qëllim regjistrimin e AMTPve për rastet kur situata faktike e pronave është e ndryshme nga ajo e përcaktuar në titull.
Ligjësimin dhe regjistrimin në regjistrin publik të pasurive të paluajtshme për ndërtimet pa leje.
Zgjidhjen e mosmarrëveshjeve për të drejtat mbi ndërtimin që legalizohet; rregullime të posaçme për një sërë rastesh të veçanta që paraqesin nevojë për zgjidhje, si për objektet pa titull pronësie dhe oborret në përdorim.
Kushtet e procedurat për përfundimin e procesit të përditësimit, inventarizimit, transferimit dhe regjistrimit të pronës shtetërore.
Procesin e përditësimit të listës së pronave shtetërore, si një procedurë tepër e rëndësishme, në funksion të pasqyrimit në regjistrin publik të gjendjes reale të pasurive dhe të përputhjes së marrëdhënieve juridike me këtë gjendje.
Jep zgjidhje për detyrimin e papërmbushur nga institucionet shtetërore dhe vendore, për të regjistruar në regjistrin e pasurive të paluajtshme pronat e tyre duke u vendosur njësive të vetëqeverisjes vendore detyrimin që të krijojnë një strukturë të posaçme, e cila do të ketë për objekt të veprimtarisë së saj inventarizimin, plotësimin, përditësimin dhe ndjekjen e procesit deri në regjistrimin e pronave në regjistrin publik të pasurive të paluajtshme dhe pajisjen me certifikatë pronësie.
Përditësimin e të dhënave në lidhje me pasuritë e sindikatave me qëllim përditësimin dhe inventarizimin e gjendjes dokumentare të pasurive të këtyre subjekteve, në funksion të sigurisë së informacionit për to, në regjistrin e pasurive të paluajtshme.
Rregullimin e pronësisë në zonat e stimuluara, ku ASHK- ja do të kryejë evidentimin në terren të njësive ndërtimore dhe truallit, si dhe harton planin e rilevimit, ku pasqyrohet gjendja ndërtimore faktike e zonës, sipas kufijve të vendosur në dokumentacionin e miratuar nga autoriteti i planifikimit të territorit.
Harmonizimin e proceseve kalimtare me procesin e trajtimit të pronës sipas ligjit nr. 133/ 2015, "Për trajtimin e pronës dhe përfundimin e procesit të kompensimit të pronave".
Rregullimin e marrëdhënieve të pronësisë mbi truallin e ndërtesave të shitura nga ndërmarrjet shtetërore apo të privatizuara, përpara dhe pas hyrjes në fuqi të ligjit nr. 7512, datë 10.8.1991, të shfuqizuar.
Përcaktimin e të ardhurave që përfitohen nga proceset kalimtare dhe destinacionin e tyre.