Për taksa pa stërkëmbësha

( vijon nga faqja 1)

... jo vetëm ecurinë e investimit, por rrezikon të çojë në faliment biznesin që ka riskuar paratë në atë investim!". Ligji "Për procedurat tatimore" i 19 majit të vitit 2008 është ndryshuar( arnuar) 157 herë në 10 vjet deri tani! Sa herë ndryshohen rregullat e lojës në pagimin e taksave, aq herë bëhen konfuzë dhe çoroditen ata që duan të jenë në rregull me detyrimet ndaj shtetit, thotë Fondi Monetar Ndërkombëtar ( FMN). Edhe në misionin e fundit në nëntor 2018, FMN paralajmëroi qeverinë për dëmet në ndryshimet në ligjin themelor të taksave, që është ligji i mësipërm, në paketën fiskale për Buxhetin e shtetit të vitit 2019. Vetë ligji "Për procedurat tatimore" ka 137 nene dhe është ndryshuar 157 herë! Imagjinoni çfarë absurdi. Janë prekur 78 nene bazë, themelet e vetë ligjit. Kjo ka sjellë një gjendje ku sjellja e organeve të mbledhjes së taksave tek ne nuk mund të parashikohet më, jo për katër vjet, por as për katër muaj. Përtej qëllimit që kanë ndryshimet gjithnjë e më të shpeshta në këtë ligj, nganjëherë edhe kontradiktore me njëra- tjetrën, ata që paguajnë taksat, në sipërmarrje të mëdha apo të vogla qofshin, nuk po i përballojnë dot ndryshimet e shpeshta. Nuk arrijnë dot t'i respektojnë, sado vullnetmirë e syçelët të tregohen. Kjo ka prodhuar në shumë raste gjoba pa mbarim, që vijnë nga moskuptimet e ligjeve dhe mosdalja në kohë e udhëzimeve për administratën tatimore. Rrëmujën e ka shtuar kapja e shtetit për interesa të grupimeve të caktuara të biznesit. Në 12 vitet e fundit, janë me dhjetëra Vendimet e Këshillit të Ministrave( VKM- të) dhe madje edhe disa ligje të caktuara, që kanë favorizuar kompani të veçanta. Ka pasur raste kur janë ndryshuar kriteret e licencimit dhe magazinimit për një industri të tërë, në varësi të interesit për të licencuar një kompani të re që ka lidhje me grupime të caktuara politike apo për të vështirësuar mbijetesën e një kompanie që është tashmë në treg. Rastet e kapjes së shtetit janë pa fund. Tre vjet më parë, Komisioni i Ekonomisë dhe Financave në Kuvend rrëzoi një propozim absurd të Ministrisë e Financave për të përjashtuar pijet energjike nga akciza. Kjo politikë e veçuar në shërbim të pak kompanive dhe për një mall konsumi luksi shkonte përpjetë politikës së rritjes së akcizës që ka ndërmarrë gjithë këto vite qeveria me mallrat e tjera. Po tre vjet më parë, në kulmin e forcimit fiskal, kur rritja e taksave vërshoi pothuajse në të gjithë zërat, qeveria hoqi Tatimin mbi Vlerën e Shtuar ( TVSHnë) për sigurimet, duke e zëvendësuar atë me tatimin 3% për primin( çmimin e sigurimit) bruto. Ky ndryshim, megjithëse u miratua në Kuvend, kaloi me debate të ashpra në komisionet parlamentare. Ligji ishte bërë qartazi për të favorizuar kompanitë e sigurimeve. Ai nuk solli përfitime as në çmime më të lira për konsumatorët e shumtë të sigurimeve ( si- domos ata të mjeteve motorike janë mbi 500 mijë!), as në të ardhura më të larta për Buxhetin e shtetit. Në fakt, tre vjet pas këtij ndryshimi skandaloz, lehtësimi tatimor mbi kompanitë e sigurimit nuk funksionoi as për qytetarët dhe as për arkën e shtetit. Nga ana tjetër, shumica e koncesioneve të dhëna që nga vitit 2008 dhe e koncesioneve të fundit me formulën partneritet publik- privat janë ofruar si shpërblesa ndaj bizneseve të lidhura ngushtë me politikën. Në praktikat ndërkombëtare, sidomos në vendet e Bashkimit Evropian, kjo dukuri( kapja e shtetit në këtë farë feje) jo vetëm që është e dënueshme, por vendet e BE- së dhe SHBA- të kanë miratuar legjislacion shtesë, në mënyrë që të parandalojnë lindjen dhe zh- villimin e këtyre qasjeve korruptuese. Tek ne, gjithçka do të ndryshojë për mirë, nëse shpluhuroset projektligji i ri për Procedurat tatimore në Republikën e Shqipërisë, i cili ka mbi tre vjet që pret në raftet e Ministrisë së Financave dhe Ekonomisë. E kishte përgatitur ministri që u silurua pas gurgulesë me mbledhjen e Tatimit mbi Vlerën e Shtuar nga një ofertë e pakërkuar e një kompanie të huaj nga Hong- Kongu. Nëse miratohet ky ligj dhe futet Kodi Fiskal si kuptim dhe praktikë në legjislacionin tonë tatimor, marrin fund qindra stërkëmbëshat ligjore që u kemi vënë në këto 11 vjet qindra mijërave shqiptarëve që duan të paguajnë korrekt taksat në këtë vend.