Meta në Gjermani, takon homologun armen: Nxitje të bashkëpunimit

Presidenti

i Republikës, Ilir Meta, ka marrë pjesë në Konferencën e Sigurisë në Mynih. Gjatë punimeve të kësaj konference, Meta është takuar edhe me homologun e Armenisë, Armen Sarkissian. Duke iu referuar marrëdhënieve përgjithësisht të mira e lidhjeve të vjetra mes dy popujve, kreu i shtetit nënvizoi rëndësinë e nxitjes së bashkëpunimit midis dy vendeve. Në mënyrë të veçantë, Meta nënvizoi rëndësinë e nxitjes dhe zhvillimit të bashkëpunimit ekonomik e tregtar. Të dy bashkëbiseduesit ndanë të njëjtin mendim lidhur me nevojën e nxitjes së kontakteve mes qytetarëve të të dyja vendeve dhe të bashkëpunimit në fushën e turizmit. Një vëmendje e veçantë iu kushtua edhe zhvillimeve në rajonin e Ballkanit dhe të Kaukazit. Ndërkohë, përmes një postimi në "Facebook", Meta thotë se sfidat e shumta të sigurisë mund të tejkalohen përmes vullnetit solid politik dhe aleancave të forta e të qëndrueshme. "Kënaqësi të marr pjesë në Konferencën e Sigurisë në Mynih. Sfidat e shumta të sigurisë mund të tejkalohen përmes vullnetit solid politik dhe aleancave të forta e të qëndrueshme. Partneriteti Trans- Atlantik mbetet jetik për rendin ku mbizotërojnë vlerat e demokracisë, lirisë dhe dinjitetit njerëzor", - shkroi Meta.