Protesta, mijëra në shesh, orët e tensionit te Kryeministria

Protesta 5 orë para godinës së qeverisë, gaz lotsjellës dhe plumba gome drejt protestuesve Detajet, nisi me lule dhe përfundoi me dhunë

Të ardhur nga çdo qytet i Shqipërisë, mijëra qytetarë shprehën dje revoltën e tyre kundër qeverisë përmes rezistencës prej 5 orësh përpara Kryeministrisë. Pikërisht zemërimin e tyre e shfrynë para derës së kësaj godine teksa e goditën me skela, tulla e gurë e madje u tentua t'i vihet flaka. Protesta nisi me lule, por dhjetëra protestues përfunduan në spital për shkak të problemeve shëndetësore të krijuara nga gazi lotsjellës i hedhur nga forcat e Gardës së Republikës. Përgjatë protestës nuk munguan përleshjet, gazi lotsjellës, uji me presion dhe bombat molotov, ndërkohë që nga protestuesit u përdorën sende të forta, gurë e shufra hekuri, që u shkulen nga skela para Kryeministrisë. Nga brenda Kryeministrisë, policia iu përgjigj me gaz lotsjellës protestuesve. Nuk mungoi as flaka në dyert e Kryeministrisë, ndërkohë që nga brenda godinës shuheshin flakët. Policia me megafon lajmëronte se veprimet e protestuesve përbëjnë vepra penale dhe se do ndëshkoheshin nga ligji. Ndërkohë, u dëmtua edhe instalacioni i kërpudhës, vepër e një artisti të huaj. Drejtuesit e opozitës qëndruan gjatë gjithë kohës në mes të protestuesve dhe ashtu siç ishte paralajmëruar, ata nuk mbajtën fjalime politike, pasi sipas tyre, protesta ishte e qytetarëve. Që herët lideri i opozitës, Lulzim Basha, u bëri thirrje qytetarëve që të qëndrojnë të bashkuar dhe të ruajnë qetësinë përballë çdo provokimi. Por, të shpeshta ishin momentet kur disa protestues goditën me gurë xhamin e derës së Kryeministrisë.

Pemë të shkulura, xhama të thyer, goditje të herëpashershme me sende të forta,

ndërkohë që vazhdimisht hidhej ujë për të sprapsur protestuesit sa herë që i afroheshin derës së Kryeministrisë. Po kështu, nga tarraca qëllohet me gaz lotsjellës, me qëllim që protestuesit të sprapsen. Protestuesit hipën në shkallët e Kryeministrisë dhe pasi dëmtuan mburojën, tentuan të hynin në godinë. Nga brenda saj drejt protestuesve është hedhur me zorrë ujë. Shumë persona u lënduan, ndërkohë që forca speciale u panë në tarracën e Kryeministrisë teksa vëzhgonin çdo detaj në protestë. Në një moment, policia u tërhoq dhe PD- ja e akuzoi se ishte e qëllimshme. Shumë protestues u ndjenë keq nga gazi lotsjellës, ndërkohë që autoambulancat mbërritën në shesh për të marrë personat e lënduar. Garda e Republikës qëlloi me plumba gome dhe gaz lotsjellës nga tarraca e Kryeministrisë në drejtim të protestuesve, të cilët çanë kordonin e policisë dhe i mësynë kryeministrinë. Përgjatë 5 orëve rezistencë në shesh, qytetarët shprehën revoltën për probleme si varfëria, papunësia apo detyrimi i fëmijëve për t'u larguar jashtë shtetit. Në protestën e djeshme gjetën vend edhe grupe qytetarësh, që mbrojnë kauza specifike e që protestojnë prej kohësh, si banorët e "Astirit" apo qytetarë të Fierzës. Por, protesta nuk kaloi pa incidente, ndërkohë që pati shumë të lënduar. Opozita akuzoi kryeministrin Edi Rama dhe policinë se provokoi protestuesit. Vetë Rama nuk ndodhej në Kryeministri, por udhëtoi drejt Vlorës dhe opozita e quajti takimin si antimiting. Protesta e nisur prej orës 11: 00 para Kryeministrisë u mbyll në orën 16: 00 me fjalën e kryetarit të PD- së.