Opozita sërish në shesh, ditën e enjte protestë para Kuvendit
Basha mbledh aleatët: Nuk ndalemi derisa të ikë Rama, revolta qytetare vazhdon "Rama hapi kordonin e policisë për të nxitur dhunën"
Pas rezistencës prej 5 orësh në bulevardin "Dëshmorët e Kombit", opozita e bashkuar përmes një mbledhjeje urgjente vendosi vazhdim e protestës deri në largimin e kryeministrit Edi Rama. Kreu i PD- së, Lulzim Basha, mes turmës së protestuesve i ftoi qytetarët në një tjetër protestë ditën e enjte, në orën 10: 00, përpara parlamentit, sikurse tha ai, për të vazhduar kryengritjen e tyre. "Sot ( dje) çdokush e ka parë forcën e qytetarëve të bashkuar, të vendosur për të mos pranuar më një kryeministër dhe qeveri të kapur në vjedhje flagrante. Dua në emër të opozitës t'ju shpreh mirënjohjen më të thellë! Kjo kryengritje qytetare do të vazhdojë. Të enjten në orën 10: 00 në protestën tjetër, më të bashkuar se kurrë. Ne u bashkuam këtu për qëndresë të vendosur. Derën e Kryeministrisë e bllokoi me duart e tij dhe nga ajo derë as nuk do të hyjë më dhe as nuk do të dalë më", u shpreh Lulzim Basha. Pas njoftimit për mbylljen e protestës, qytetarët e shumtë u shpërndanë për t'u rikthyer në protestë ditën e enjte para parlamentit. Më herët kreu i opozitës akuzoi se protestuesit nuk shkuan në sheshin para Kryeministrisë për të ushtruar dhunë, por u provokuan nga policia. Për kryetarin e PD- së, kërkesa politike është krijimi i një qeverie teknike. "Është thirrur nga opozita me një qëllim politik, qeveri transitore, zgjedhje të parakohshme, t'i japim fund qeverisë që është kapur në vjedhje tek ' Unaza', është kapur në vjedhje te Teatri, është kapur në vjedhje të votave. Asnjë protestues nuk erdhi për të kryer akte dhune, ju e dini fare mirë sesi organizohen protestat e dhunshme. Asnjë prej protestuesve këtu nuk erdhi për të kryer akte dhune. Ata u provokuan dhe u nxitën nga një skenar i mirëmenduar i Edi Ramës dhe i ekzekutuar nga një grusht policësh të korruptuar dhe të lidhur me krimin", theksoi z. Basha. Kreu i opozitës akuzoi se për shkak të skenarit
ogurzi, gjendja ka dalë jashtë kontrollit. "Kordoni i policisë u ça pas një përpjekjeje fare të lehtë të banorëve të ' Unazës'. Kordoni i policisë u ça që të përdorej dhuna dhe gazi lotsjellës. Këto blegërima që dëgjoni janë pjesë e një skenari kriminal të policisë, të vënë nën urdhrat e Edi Ramës për të shkaktuar një gjendje të tillë. Protestuesit kishin ardhur për të demonstruar
paqësisht, pa dhunë, në qendër të sheshit po flisnin qytetarët. Për shkak të skenarit të tyre ogurzi, gjendja ka dalë jashtë kontrollit dhe nuk duket asnjë polic askund. Nuk marrin asnjë kontakt me organizatorët e protestës, por vazhdon t'i fryjë skenarit të përplasjes dhe dhunës me këto mesazhe idiote. Policia nuk po zbaton ligjin, policia e ka thyer ligjin", u shpreh z. Basha.