Meta takon Merkelin: Mësimet e nxjerra nga shkuara, aktuale edhe sot
Igjendur në Gjermani ku po merr pjesë në Konferencën e Sigurisë në Mynih, Presidenti i Republikës, Ilir Meta ka ndjekur me shqetësim edhe zhvillimet gjatë ditës së djeshme në Tiranë. Ai u bëri thirrje palëve për vetëpërmbajtje dhe respektim të institucioneve. "Duke ndjekur me vëmendje të veçantë protestën e opozitës, bëj thirrje për vetëpërmbajtje nga të gjithë për evitimin e konfrontimeve dhe dhunës. Qytetarët duhet të protestojnë të lirë dhe duhet të respektohen institucionet", - shprehej presidenti në mesazhin e vet. Ndërkohë që gjatë punimeve të Konferencës së Sigurisë, ai takoi edhe kancelaren, Angela Merkel, ndërsa në një postim në rrjetet sociale, z. Meta vlerësoi mesazhet e përcjella prej saj çështjeve të sigurisë. "Mesazhe të forta dhe të qarta të Kancelares Angela Merkel sot në Konferencën e Sigurisë në Mynih. Mësimet e nxjerra që nga koha e pas Luftës II Botërore mbeten po aq aktuale sot: uniteti europian dhe partneriteti Trans- Atlantik, në themel të sigurisë dhe lirisë që gëzojmë sot. Marrëveshja e Prespës, një nga arritjet më të rëndësishme në fushën e sigurisë gjatë kësaj kohe", shkroi Meta.