PDIU: Po, propozimit të Bashës. Ndoka: Nuk ka qëndrim të opozitës

Propozimi

i kryetari të Partisë Demokratike, Lulzim Basha për djegien e mandateve të deputetëve ka gjetur mbështetjen e një pjese të aleatëve të tij. E para që u shpreh publikisht pro këtij propozimi ishte Partia për Drejtësi, Integrim dhe Unitet, e Shpëtim Idrizit. Nëpërmjet një deklarate të shpërndarë për mediat PDIU ka mbështetur propozimin e Bashës ndërsa ka kërkuar zgjedhje të parakohshme dhe krijimin e një qeverie tranzitore. "PDIU mbështet vendimin e PD- së për ti dhënë zgjidhje politike vendit, si i vetmi instrument që politika e përgjegjshme ka për të zgjidhur krizën shumëdimensionale që sot ka kapluar vendin, krizë politike, ekonomike, sociale dhe krizë përfaqësimi, nëpërmjet zgjedhjeve të parakohshme dhe një qeverie tranzitore, që do të garantojë që shqiptarët të votojnë dhe të zgjedhin për herë të parë të lirë. Vlerësojmë propozimin e z. Basha për djegien e mandateve, si një shprehje e vullnetit të qartë, që para zërit të qytetarëve dhe nevojës së vendit për zgjidhje politike, nuk vuri status quo- në e një parlamenti ilegjitim, por bëri fakt zgjidhjen politike që kjo mazhorancë po e refuzon me arrogancë", - thuhet në këtë deklaratë. Po ashtu edhe PDK e Nard Ndokës ka mbështetur në parim një propozim të tillë, ndonëse deklaron se nuk ka një vendim të opozitës për këtë çështje. "Nuk ka një qëndrim si opozitë e bashkuar. Unë në parim jam dakord", - tha Ndoka i pyetur nga ' Gazeta Shqiptare'.