Doli në protestën e opozitës, shkarkohet nënkryetarja e Bashkisë së Tiranës
Mëngjesin
e djeshëm, nënkryetarja e Bashkisë së Tiranës, Kozeta Mesiti, e propozuar nga PDIU, është shkarkuar nga detyra për shkak të pjesëmarrjes së saj në protestën e organizuar nga opozita të shtunën. Gjithashtu, veç Mesitit u shkarkua edhe drejtori i ' Tregjeve', Sokol Hysa, po ashtu i propozuar nga radhët e PDIU, i cili gjithashtu u pa në protestën e opozitës. Mesiti dhe Hysa ishin ende në bashki pas koalicionit në zgjedhjet e 2015ës. Shkarkimi i tyre ka ardhur që në orët e para të mëngjesit, firmosur nga kryebashkiaku Veliaj. Me sa duket, Veliaj nuk e ka toleruar faktin që zëvendësja e tij në Bashkinë e Tiranës dhe drejtuesi tjetër i PDIU- së i janë bashkuar një proteste të opozitës, ndërsa mbajnë pozicione të larta në një bashki, që drejtohet nga përfaqësuesit e mazhorancës qeverisëse. Menjëherë pas lajmit të shkarkimit të dy zyrtarëve të Bashkisë së Tiranës nga radhët e PDIU- së ka ardhur edhe reagimi i kryetarit të kësaj force, Shpëtim Idrizi. I kontaktuar nga "BalkanWeb", kryetari i PDIU- së e quan vendim sa hakmarrës aq edhe qesharak atë të kryebashkiakut Veliaj dhe thotë se e drejta për të protestuar është e drejtë e çdo qytetari.