Policia e Shtetit: Protestuesit do tentojnë të hyjnë me forcë në Kuvend
Opozita protestë para Kuvendit, mbi 1000 policë në terren
Policia
e Shtetit njoftoi dje se gjatë protestës së sotme, e paralajmëruar nga opozita, ka të dhëna sipas saj, për nxitje dhune dhe organizime me natyrë kriminale. "Nga informacionet e mbledhura nga shërbimet përkatëse, ka të dhëna për nxitje të dhunës dhe organizime me natyrë kriminale. Synohet hyrja me forcë në sallën e parlamentit, duke ushtruar dhunë mbi personelin që ka detyrimin ligjor të sigurojë mbrojtjen e institucionit themelor të demokracisë", thuhet në reagim. Në deklaratë, policia u bën thirrje organizatorëve që të distancohen hapur nga dhuna dhe të bëjnë thirrje për respektimin e ligjit nga çdo protestues. Po ashtu Policia e Shtetit u bën apel të gjithë atyre që duan të ushtrojnë nesër lirinë e tubimit dhe të drejtën e protestës, që të mos përfshihen në asnjë rast e për asnjë arsye në veprime të dënueshme ligjërisht. "Policia e Shtetit e siguron opinionin publik, se forcat e rendit dhe sigurisë janë të gatshme t'i përgjigjen me forcën e ligjit dhe në proporcionalitet të plotë, çdo veprimi të paligjshëm apo akti dhune. Po ashtu, janë marrë të gjitha masat për identifikimin dhe skedimin e çdo individi që do të evidentohet si shkelës i ligjit, si edhe për ndalimin e për nxjerrjen e çdo shkelësi përpara drejtësisë",thuhet në reagim. Policia shprehet se do të bllokohen disa akse rrugore ku do të zhvillohet protesta, ndërsa do të zhvillohen kontrolle përgjatë akseve rrugore kombëtare. Mësohet se mbi 1000 forca policie do të angazhohen në mbarëvajtjen e kësaj proteste. Shpërndarja e uniformave blu pritet të jetë e ngjashme me protestën e së shtunës. Përballë protestuesve me një kordon që do të jetë përgjatë gjithë rrethimit të parlamentit do të jenë punonjësit e rendit, ndërsa forcat Shqiponja dhe FNSH do të jenë në gatishmëri në bule- vardin "Zhan Dark" dhe brenda rrethimit të xhamisë së Namazgjasë. Në gatishmëri pranë godinës së parlamentit do të jenë edhe Garda e Republikës, e cila në rast se nga ana e protestuesve do të ketë tentativa për të hyrë në parlament dhe për të bërë akte dhune do të përdorë gaz lotsjellës. Në gatishmëri pranë ambienteve të Parlamentit do të jenë dhe zjarrfikëset dhe ambulancat. Kufizime për qarkullimin rrugor do të ketë tek "Xhorxh Bush" dhe pjesërisht në bulevardin "Zhan Dark". Autobusët, ashtu si protestën e shkuar, nuk do të lejohen në qytet. Të ardhurit nga veriu do ndalojnë tek "Asllan Rusi", kurse të ardhurit nga Jugut tek Ekonomiku.