Abuzimet me 5 tenderët në MD, merret në pyetje ish- ministri Ylli Manjani
Deputeti i LSI- së, Petrit Vasili nuk paraqitet në organin e akuzës "Në prokurori isha si dëshmitar. Praktikat i firmosa për shkak të detyrës, s'jam marrë me teknikalitete"
Ish- ministri i Drejtësisë, Ylli Manjani është mar rë dy ditë më parë në pyetje në prokurorinë e Tiranës në lidhje në lidhje me skandalin e tenderëve të zhvilluar në këtë institucion gjatë viteve 2016- 2017. Burime për "Gazeta Shqiptare" bënë me dije se gjatë marrjes në pyetje për afro dy orë, Manjani ka thënë se ka firmosur praktikat për shkak të detyrës dhe se nuk është marrë me teknikalitete. Mësohet se prokuroria e Tiranës i ka dërguar një fletëthirrje edhe Petrit Vasilit për të dëshmuar ditën e djeshme në orën 14: 00, por ish- ministri i Drejtësisë, aktualisht kreu i grupit parlamentar të LSI nuk është paraqitur. Ndërkaq, Ylli Manjani ka folur për "GSH" pas dëshmisë së dhënë në prokurori në lidhje me dosjen e abuzimit me tenderët në këtë institucion në kohën kur ai ishte ministër. Manjani deklaroi se vajtja në prokurori e tij ishte në cilësinë e dëshmitarit. Ai tha se ka folur kur mbante një detyrë publike dhe se tani nuk ka përgjegjësi të japë shpjegime publike. "Unë nuk mbaj tashmë asnjë detyrë publike e për pasojë nuk kam asnjë barrë të jap shpjegime publike për këtë gjë. Gjithçka kam pasur për të ndarë me publikun e kam bërë kur mbaja detyrën publike. Sot jam qytetar i lirë dhe pa asnjë hezitim jap shpjegimet e mia në çdo institucion hetimor. Këtë gjë e bëj në diskrecion të plotë dhe në respekt të ligjit. Mosdhënia e shpjegimeve do ishte anomali jo e kundërta",deklaroi Manjani. Gjithsesi, ai ka preferuar të mos flasë për dëshminë e tij dhënë para oficerit të policisë gjyqësore. "Vajtja ime atje nuk kishte asnjë status tjetër përveç se të dëshmitarit. Përmbajtja e dëshmisë është konfidenciale",- u shpreh Manjani.
ABUZIMI ME TENDERAT
Disa javë më parë, u vunë nën masë sigurie, 11 zyrtarë të Ministrisë së Drejtësisë, pas dyshimeve për abuzim me 5 tenderë të dhënë në periudhën 2016- 2017. Për drejtorin Ekonomik, Aurel Lamçe dhe specialistin e IT Arlind Alikajn gjykata ka ndryshuar masën e sigurisë nga arrest me burg në arrest shtëpie. Gjykata ka vendosur "arrest shtëpie" për Juliana Hoxhën, ish- sekretaren e Përgjithshme në MD. Gjithashtu, gjykata ka lënë në fuqi masën "arrest me burg" për specialistin tjetër të IT, Lusien Ali, i shpallur në kërkim. Për 8 zyrtarë të tjerë, u caktua masa "detyrim paraqitje". Sipas prokurorisë hetimet janë shtrirë në 5 tenderë si: Mirëmbajtja dhe mbikëqyrja e sistemit ICMIS në 7 Gjykatat Administrative, Përmirësimi i sistemit të mbikëqyrjes elektronike në fushën penale, Përmirësimi, Zhvillimi dhe Mirëmbajtja e Regjistrit Noterial Shqiptar, Sistemi i Monitorimit me kamera për burgun e Lezhës dhe Fushë Krujës, Përmirësimi dhe mirëmbajtja e sistemit elektronik të çështjeve të përmbarimit.
Hetimet kanë zbuluar faktin se përmes shpërdorimit të detyrës, zyrtarët i kanë shkaktuar shtetit një dëm të madh financiar. Në fokusin e prokurorisë ishin funksionarët publikë që kanë qenë pjesë e njësive të prokurimit, komisioneve të vlerësimit të ofertave dhe komisioneve për mbikëqyrjen e zbatimit te kontratave. Tenderët janë zhvilluara në kohën kur Ministrinë e Drejtësisë e drejtuan Petrit Vasili dhe Ylli Manjani.