Premtimi i ministres: Rritje pagash me 7% për punonjësit e shëndetësisë
Ogerta Manastirliu: Brenda shkurtit 300 specializantë i shtohen shërbimit spitalor "Nisin punën 54 mjekë të rinj familjeje në mbarë vendin"
Duke filluar nga muaji prill do të nisë rritja e pagave me 7% për të gjithë punonjësit e shëndetësisë në vend. Lajmi është bërë me dije ditën e djeshme nga ministrja e Shëndetësisë dhe Mbrojtjes Sociale, Ogerta Manastirliu, gjatë një takimi me mjekët e rinj. Ajo u garantoi punonjësve të shëndetësisë se ky premtim do të përmbushet. "Duke filluar nga muaji prill, nis rritja e re e pagave 7% për të gjithë punonjësit e shëndetësisë", tha Manastirliu në fjalën e saj.
MJEKËT E RINJ
Ndërkohë, ditën e djeshme, ministrja e Shëndetësisë dhe Mbrojtjes Sociale priti 54 mjekët e rinj që u punësuan në sistemin e kujdesit shëndetësor parësor në të gjithë vendin. "Ju siguroj se kushtet e punës që do të gjeni sot në qendrat shëndetësore janë shumë më të përmirësuara dhe më vjen mirë që ndër ju. shumë kanë zgjedhur të punojnë në qendra shëndetësore të largëta", tha Manastirliu. Sakaq, 54 mjekët e rinj të familjes janë fitues nga konkursi i shpallur nga Ministria e Shëndetësisë, për mjekë të përgjithshëm në kujdesin shëndetësor parësor. Nga Kukësi në Sarandë, mjekët e rinj do të plotësojnë në këtë mënyrë një pjesë të mirë të nevojave edhe në qendra shëndetësore të zonave të thella, si qendra shëndetësore Grykë Caje në Kukës, Fushë- Cidhe në Dibër, Zharrëz në Fier, Pishaj në Gramsh, Poliçan në Skrapar, e në shumë struktura të tjera të parësorit, për të shërbyer afër komunitetit, aty ku janë nevojat. Sipas të dhënave, plot 103 mjekë ap- likuan pranë Ministrisë së Shëndetësisë dhe Mbrojtjes Sociale, në një kohë që po vijon procesi i punësimit edhe me mjekët e qendrave shëndetësore në Tiranë.
SPECIALIZIMET
Gjatë takimit me mjekët e sapopunësuar, ministrja e Shëndetësisë dhe Mbrojtjes Sociale ka folur edhe mbi specializimet që janë drejt përfundimit. "Sa u takon spitaleve, brenda muajit shkurt përfundojnë specializimet 300 mjekët e parë specialistë ( pas një bllokimi 4- vjeçar), të cilët do t'i shtohen shërbimit spitalor në të gjithë vendin", - bëri me dije ministrja e Shëndetësisë dhe Mbrojtjes Sociale në deklaratën e saj.
REHABILITIMI I DISPANCERISË
Klinika e specializuar për sëmundjet e mushkërive e qytetit të Tiranës, apo Dispanceria, pas më shumë se dy dekadash është rehabilituar dhe pajisur me aparatura mjekësore të reja. "Investimi në pajisjet digjitale të radiologjisë ka shkurtuar me 3 herë kohën e pritjes për shërbimet e specializuara në këtë qendër. Me aparaturat e reja laboratorike është zgjeruar gama e analizave, nga 3 që bëheshin më parë, në 16 lloje analizash klinike, biokimike, bakteriologjike dhe analiza specifike për sëmundjet e mushkërive, duke garantuar shërbimin e plotë laboratorik për pacientët", - thotë ministrja e Shëndetësisë.