Përfundon afati i aplikimeve për SPAK, kreu i KLP: Ja kriteret si do përzgjidhen 15 prokurorët
Taulant Balla: PD- LSI, sjellje tipike e një organizate terroriste "Në qershor, Shqipëria do të ketë prokuror të përgjithshëm me mandat kushtetues"
Ditën e djeshme është mbyllur zyrtarisht afati që prokurorët të kandidojnë për të qenë pjesë e Prokurorisë Speciale, që pritet të hetojë rastet e korrupsionit të zyrtarëve të lartë. Në përfundim të afatit rezultojnë 27 prokurorë në garë për 15 vende në SPAK. Në një intervistë për gazetaren e Klodiana Lala, kreu i Këshillit të Lartë të Prokurorisë, Gent Ibrahimi tha se kandidimi i 27 prokurorëve është lajm i mirë, duke u nisur nga skepticizmi që kanë edhe për shkak të vetingut. "Është numër i mjaftueshëm për ne. E kuptoj hezitimin e prokurorëve, është bërë shkas edhe procesi i vetingut për një lloj skepticizmi të tillë. Fakti që kemi 27 kandidatë, është lajm i mirë. Na takon neve që të zgjedhim tani më të mirët mes tyre", u shpreh Ibrahimi. Për t'u përzgjedhur, Ibrahimi tha se ka kritere të shumta që nisin që nga aftësia për të hetuar me efiçencë, për të qenë në gjendje të konfiskojnë pasurinë e krimit, për të treguar integritet etj.. I pyetur se si do të procedohet me kandidatët, pasi deri më tani vetëm 5 prej tyre e kanë kaluar vetingun, Ibrahimi sqaroi se: "Kjo çështje do gjejë rregullim sipas ligjit. Kemi të bëjmë me një ngritje në detyrë, ne do presim vetingun për të gjithë", - pohoi ai. Por, sa do të duhet të presim që të kemi një Prokurori Speciale funksionale? Ibrahimi nuk dha një datë të saktë, por sqaroi se duke parë volumin e dosjeve, do të marrë disa muaj kohë. "Duke pasur parasysh volumin e madh, 10 dosje për çdo kandidat, pra 270 dosje dhe faktin se nuk kemi mbështetje administrative dhe financiare, pra kjo do marrë kohë. Mund të marrim disa muaj në fund ne do ia dalim të bëjmë më të mirën", - vijoi ai. Gjithashtu, kreu i KLP- së pohoi se më 19 mars do të hapet gara për prokuror të përgjithshëm dhe se në qershor do bëhet zgjedhja e tij. Ndërkaq, kreu i grupit parlamentar të Partisë Socialiste, Taulant Balla ka përshëndetur përmbylljen e garës për SPAK.
POSTIMI I PLOTË I BALLËS
Prokuroria Speciale Antikorrupsion ( SPAK) në rrugë të mbarë, me një numër të konsiderueshëm kandidatësh ( 27) për të marrë këtë detyrë të rëndësishme. Politikanët e korruptuar nuk e ndalin dot më, edhe me përpjekjen e sotme. Nuk është rastësi që akti i sotëm antidemokratik i Sali Berishës, Lulzim Bashës dhe Monika Kryemadhit ndodhi pikërisht në ditën e përfundimit
të aplikimeve për SPAK dhe në ditën që Kuvendi duhet të votonte strukturën e institucioneve kryesore të drejtësisë së re: Këshilli i Lartë i Drejtësisë ( KLGJ) dhe Këshilli i Lartë i Prokurorisë ( KLP). Megjithatë, Kuvendi i shqiptarëve do ta votojë në seancën më të parë javën e ardhshme. Mandatet që PD dhe LSI paraqitën dorëheqjet nuk janë personale, as të partive respektive, por janë shprehje e vullnetit të popullit. Dorëzimi i dorëheqjeve prej
shumë prej deputetëve të këtyre dy partive përbën një tradhti për të gjithë ata qindra mijëra qytetarë që besuan te platforma e opozitës në qershor 2017. Kjo sjellje e paprecedentë e PD dhe LSI sot ngjason gjithmonë e më shumë me një sjellje tipike të një organizate terroriste, e gatshme për të hedhur në erë të gjithë sistemin. Por, sistemi demokratik në Shqipëri është tashmë i konsoliduar, ndërsa institucionet shqiptare janë partnere të besueshme të SHBA dhe
BE. Prej vitit 2013, Shqipëria ka përshpejtuar dhe thelluar ritmin e reformave, si dhe ka konsoliduar progresin në përmbushjen e pesë përparësive kyçe për hapjen e negociatave të anëtarësimit, protestat e dhunshme dhe dorëzimi i mandateve nga ana e Partisë Demokratike dhe Lëvizjes Socialiste për Integrim vetëm pak muaj larg mbledhjes së Këshillit Europian në qershor 2019, minojnë qartësisht perspektivën europiane të Shqipërisë.