PS dhe KQZ, shifra të përafërta: Pjesëmarrja në votime, 21.6 për qind
Numri i votuesve, vetëm 7 mijë më shumë seç mori PS në 2017- ën
Shqipëria kaloi dje një provë shumë të vësh tirë, atë të organizimit të zgjedhjeve për pushtetin vendor. Pavarësisht situatës konfliktuale dhe retorikës së rënduar parazgjedhore, procesi i votimit për shkak të mospjesëmarrjes së opozitës dhe mungesës së konkurrencës ishte një nga më të qetët dhe me më pak incidente, krahasuar me të gjitha proceset zgjedhore të zhvilluara më parë. Kjo, pasi u regjistrua vetëm një numër i vogël incidentesh, nga të cilët vetëm tre prej tyre të proceduar zyrtarisht nga prokuroria. Në kushtet e mungesës së konkurrencës reale, megjithëse procesi i numërimit nuk ka përfunduar, rezultati në këtë rast nuk përbën asnjë surprizë, ndaj dhe beteja politike u përqendrua vetëm te pjesëmarrja. Partia Socialiste, Partia Demokratike dhe Komisioni Qendror i Zgjedhjeve dhanë dje të dhëna të ndryshme, çka vë në dyshim vërtetësinë e të dhënave të servirura. Kështu, KQZ- ja dhe PS- ja dhanë dje në mbrëmje shifra të përafërta që variojnë në mbi 770 mijë vota, ose rreth 22 për qind të të gjithë atyre që ishin në listat e zgjedhësve, ndërkohë që PDja raportoi se pjesëmarrja nuk i kaloi 15 për qind.
KQZ
Sipas të dhënave zyrtare të KQZ- së, dje deri në mbyllje të procesit të votimit në orën 19: 00 votuan plotë 771863 zgjedhës ose 21.6% e zgjedhësve me të drejtë vote. Një shifër kjo, që ndryshoi me plot 100 mijë vota vetëm në 1 orë, kjo pasi deri në orën 18: 00 KQZ- ja kishte raportuar një pjesëmarrje prej 671 votuesish. Nga ana tjetër duhet theksuar se shifra 771863 pjesëmarrësish në votim përkon thuajse plotësisht edhe me shifrën e dhënë dje nga burime nga PS- ja, të cilat raportuan për një shifër të përafërt, që i kalonte 770 mijë votues pjesëmarrës në votime. Ndërkohë që sipas të dhënave të deklaruara nga KQZ- ja Pusteni, Librazhdi dhe Tepelena janë tri bashkitë që kanë shënuar pjesëmarrjen më të madhe në votime, ndërsa Lezha, Shkodra dhe Memaliaj, pjesëmarrjen më të ulët. Më konkretisht, Bashkia e Pustecit e populluar nga komuniteti maqedonas sipas KQZ- së pati një pjesëmarrje prej 55.44%, ajo e Librazhdit 37.52% dhe Tepelena 36.59%. Gjithashtu, te bashkitë që kanë pasur një pjesëmarrje të lartë janë edhe Klosi me 35.17%, Poliçani me 35.46% apo dhe Puka me 32%. Ndërkohë që listën e bashkive që patën pjesëmarrjen më të vogël e kryeson Lezha me 8.93%, Memaliaj me 9.01%, Shkodra me 9.67%, Kamza me 10.95%, Dropolli me 11%. Ndërkohë, sa u përket bashkive të mëdha, evidentohet Tirana dhe Fieri që kanë kaluar mesataren në rang vendi, duke shënuar një pjesëmarrje mbi 25 për qind. Nisur edhe nga fakti se bëhet fjalë për dy nga bashkitë më të mëdha, kjo pjesëmarrje ka ndikuar në mënyrë direkte te rritja e mesatares në rang vendi. Ndërkohë që nga ana tjetër durrsakët nuk ia kanë falur PS- së historitë e muajve të fundit me blerje votash, pasi Durrësi është një nga bashkitë që ka shënuar një pjesëmarrje shumë të vogël dhe që mund të lexohet edhe si një dështim për socialistët. Në Durrës pjesëmarrja ishte vetëm 13 për qind, shumë më e vogël se mesatarja në rang vendi. Po ashtu, një dështim mund të konsiderohet për PS- në edhe pjesëmarrja në zonën e kryeministrit, Vlorë, e cila ishte vetëm 19%. Ndoshta është rastësi, por shifra e pjesëmarrjes e raportuar nga KQZ- ja është vetëm pak vota më shumë se sa është numri i votave që ka marrë PS- ja gjatë zgjedhjeve të 2017- ës. Në zgjedhjet e shkuara parlamentare, PS- ja arriti që të siguronte 764 mijë vota e vetme, çka përkon afërsisht me numrin e pjesëmarrësve në votimet e djeshme. E nëse pjesëmarrësit e djeshëm do t'i konsiderojmë si mbështetës të PS- së, atëherë PS- ja i referohet pikërisht këtij rezultati kur flet për rikonfirmim.