Rama: S'ka zgjedhje të parakohshme, opozita s'e merr dot peng qeverinë
Kryeministri ka paralajmëruar se Presidenti Meta do të shkarkohet nga Kuvendi "Kishte një rrezik shumë të prekshëm për përleshje"
Kryeministri Edi Rama ka përjashtu ar në mënyrë kategorike mundësinë e mbajtjes së zgjedhjeve të parakohshme. Gjatë një interviste për gazetën e njohur italiane "La Stampa", kreu i qeverisë ka refuzuar zgjedhjet e parakohshme të përgjithshme si një mundësi për të dalë nga kriza politike. Sipas tij, qeveria dhe mazhoranca qeverisëse nuk mund të merret peng nga opozita. Kështu, pyetjes a do të pranonit zgjedhje të parakohshme për të bashkuar vendin, kryeministri Edi Rama iu përgjigj shkurt: "Jo. Opozita nuk mund të marrë peng maxhorancën". Ndërkohë që nga ana tjetër, ai ka mbrojtur procesin zgjedhor të së dielës, ndërsa theksoi se të gjithë shqiptarët që morën pjesë në të, shpëtuan vendin dhe demokracinë nga kërcënimi që sipas tij vinte nga opozita. Sipas tij, shqiptarët me maturinë dhe pjesëmarrjen në zgjedhje mënjanuan edhe rrezikun që sipas kryeministrit ekzistonte për një përleshje civile. "Është një fitore e madhe, edhe për mua. Shqiptarët që shkuan të votojnë shpëtuan vendin. Ishte në rrezik shteti i së drejtës. Nuk ishin zgjedhje vetëm për kryetarët e bashkive, kishte një rrezik shumë të prekshëm për përleshje. Nuk pati të tilla, sepse nuk ishte populli që i donte ato", - shprehet Rama gjatë kësaj interviste. Nga ana tjetër si thekson se duke mbrojtur me forcë datën 30 qershor si datë për mbajtjen e zgjedhjeve, ai dhe mazhoranca që drejton mbrojtën demokracinë dhe shtetin e së drejtës. Ai gjithashtu ka theksuar se nuk mund të hiqet paralele mes rastin e të vitit 2006 kur u shtynë zgjedhje dhe rastin të tanishëm, kjo pasi sipas tij, këto dy çështje nuk janë të ngjashme. "Në atë kohë problemi ishte falsifikimi i dokumenteve të identitetit. Këtë herë opozita zgjodhi të tërhiqej përpara se të fillonte beteja. Shqipëria ka nevojë për ndërtimin e një shteti demokratik dhe europian. Kemi një traditë të brishtë për institucionet pas 50 viteve diktaturë, që na kishte transformuar në Korenë e Veriut të Europës. Duke mos i shtyrë zgjedhjet, mbrojta demokracinë. SHBA dhe BE e kuptuan", - deklaroi Rama për "La Stampa". Në këtë drejtim, ai ka refuzuar të komentojë edhe diskutimet në
lidhje me qëndrimin e mbajtur nga Presidenti i Republikës për ligjshmërinë e zgjedhjeve të 30 qershorit, duke bërë të ditur se mazhoranca ka nisur një proces shkarkimi ndaj tij. "Po zhvillohet një procedurë ' impeachment' për Illir Metën, do të shkarkohet nga parlamenti për shkelje të rëndë antikushtetuese. Duke mbështetur bojkotimin e zgjedhjeve, dekretoi vetëvrasjen e tij politike duke shoqëruar drejt harakirit të gjithë opozitën", - deklaroi Rama. Më tej, ai ka komentuar edhe publikimet e përgjimeve nga "Bild", të cilat i ka konsideruar si pjesë të planit për të destabilizuar
vendin dhe penguar procesin e integrimit në BE. "Nuk kam nevojë të mbrohem nga asgjë. Po përgatitemi për një luftë të madhe kundër korrupsionit, një pastrim me rrënjë të shumë gjykatësve të korruptuar. Përgjimet janë pjesë e kësaj rruge", - shprehet kryeministri. Ndërkohë që edhe gjatë takimit me drejtuesit e Policisë së Shtetit, Rama ka folur sërish për një plan antikombëtar, që sipas tij, u evitua falë edhe rolit të luajtur nga policia. "Faleminderit në emrin tim, qeverisë shqiptare dhe çdo njeriu të zakonshëm të këtij vendi që sot ndihet i çliruar nga hija kërcënuese e ankthit për
fatin e zgjedhjeve të 30 qershorit, e cila u vërtit për muaj të tërë nëpër Shqipëri dhe hyri në shtëpitë dhe mendjet e zemra të qytetarëve të këtij vendi falë vënies në zbatim të një plani politik antikombëtar kundër zgjedhjeve, kundër drejtësisë, kundër Shqipërisë mu në prag të vendimit për çeljen e negociatave për anëtarësim në BE! Faleminderit për punën mundin dhe sakrificën e forcave të Policisë së Shtetit, të cilat mbajtën me përkushtim, dinjitet, profesionalizëm një ngarkesë të jashtëzakonshme fizike dhe psikologjike në tërë këto muaj të mbrapshtë!", - tha Rama.