OSBE letër Ramës: Ndrysho paketën antishpifje për mediat online

Përfaqësuesi i OSBE i ka dërguar kryeministrit një rishikim ligjor mbi ndryshimet "I jep AMA- s fuqi që mund të ndikojë në lirinë e shprehjes"

Organizata për Siguri dhe Bashkëpunim Europian ( OSBE) ka shprehur sërish rezerva në lidhje me paketën antishpifje të miratuar nga qeveria pak javë më parë, ndaj ajo thekson se ka nevojë për ndryshime të tjera për ta sjellë në përputhje me standardet e kërkuara dhe për të respektuar lirinë e shprehjes. Përfaqësuesi i OSBE- së për Lirinë e Medias, Harlem Desir i ka dërguar Kryeministrit të Shqipërisë Edi Rama një rishikim ligjor mbi ndryshimet në Ligjin për Mediat Audiovizuale në Shqipëri, ligjin për Komunikimet Elektronike, dhe dispozita të tjera përkatëse në lidhje me rregullimin e llojeve të caktuara të përmbajtjeve të ofruara përmes internetit. Kjo analizë ligjore është pjesë e një procesi të gjatë konsultimi ndërmjet Zyrës së Përfaqësuesit dhe qeverisë gjatë hartimit të legjislacionit. "Unë e vlerësoj bashkëpunimin konstruktiv me autoritetet, edhe pse disa përmirësime në projektligje ende duhet të futen. Shpresoj që rekomandimet tona të merren parasysh dhe se modifikimet do të futen gjatë procesit parlamentar për të siguruar pajtueshmëri më të mirë të legjislacionin e ardhshëm me standardet ndërkombëtare mbi lirinë e shprehjes dhe lirinë e medias", - tha Përfaqësuesi i Misionit gjatë publikimit të kësaj analize. Rishikimi ligjor i propozuar nga OSBE propozon, në veçanti, të modifikojë nenin 132/ 1 që i jep AMA- s kompetencën për të detyruar ofruesit e shërbimeve të botimeve elektronike të publikojnë një kërkesë faljeje, të heqin përmbajtjen ose të futin një njoftim popup në rastet e shkeljeve të dispozitave në veçanti në nenin e ri 33/ 1. Në këtë artikull, referimi ndaj "respektit të privatësisë dhe dinjitetit të qytetarëve", i cili është i gjerë, i jep AMA- s fuqi të madhe të re që mund të ndikojë në lirinë e shprehjes. "AMA ose ndonjë organ administrativ apo rregullator nuk duhet të merret me

çështjet e shpifjes, të cilat duhet të mbeten nën kompetencat e gjykatave", - tha Désir. Analiza, gjithashtu, sugjeron një formulim të ri për paragrafin 3 të nenit 132, i cili përcakton mundësinë, në rastet kur shërbimet e medias elektronike "mund të favorizojnë" veprat penale të pornografisë së fëmijëve, inkurajimi i akteve terroriste ose shkelja e sigurisë kombëtare, "të bllokojnë qasjen në internet". Formulimi i propozuar synon, gjithashtu, qartësimin e kompetencave të Autoritetit Kombëtar për Certifikimin Elektronik dhe Sigurinë Kibernetike ( NAECES), AMA dhe AKEP në këtë fushë. Shqyrtimi ligjor ngre shqetësime rreth kompetencave të dhëna AKEP- it në propozimin për ndryshimin e Ligjit për komunikimet elektronike, lidhur me miratimin e masave për të mbrojtur një gamë të gjerë interesash, duke përfshirë interesat e vendit, sigurinë publike, të drejtat themelore dhe çdo dispozitë të përfshirë në sistemin ligjor shqiptar. Këto nocione janë shumë të definuara dhe mund të jenë në kundërshtim me standardet ndërkombëtare të sigurisë juridike, proporcionalitetit dhe domosdoshmërisë dhe nuk përfshijnë rregulla specifike për mënyrën e sigurimit të mbrojtjes së lirisë së shprehjes. Për më tepër, neni 133 i projektligjit ende i referohet gjobave ekonomike shumë të larta që do të vendosen në rastet e shkeljeve. "Shpresoj se analiza ligjore, që përfshin një numër rekomandimesh, do të jetë i dobishëm në diskutimet e mëtejshme. Zyra ime do të vazhdojë të jetë e angazhuar ngushtë në këtë proces, i cili duhet të jetë gjithëpërfshirës për të gjithë aktorët relevantë deri në përfundimin e saj ", - përfundoi Désir.