Meta e NATO: Kërkesë qeverisë t'u përmbahet angazhimeve
Presidenti
i Republikës, Ilir Meta i kërkon qeverisë që të përmbushë detyrimet e saja ndaj Organizatës së Atlantikut të Veriut sa i përket buxhetimit të forcave të armatosura. Ai priti dje në një takim të veçantë kryetarin e Komitetit Ushtarak të NATO- s, Marshall Sir Stuart Peach, të cilit i shprehu mirënjohjen për mbështetjen e dhënë projektin e Bazës Ajrore të Kuçovës, duke garantuar se bashkëpunimi me Aleancën ka një rëndësi strategjike për sigurinë kombëtare dhe rajonale. Ndër të tjera Meta siguroi se Shqipëria do të vijojë kontributet e saj në misionet në Afganistan, Kosovë, Bosnje- Hercegovinë, Mali, Detin Egje, Letoni, Rumani, Mesdhe, etj. Duke e vlerësuar si legjitime kërkesën e NATO- s për të ndarjen e drejtë të barrës së përgjegjësive, kreu i shtetit theksoi se i ka kërkuar qeverisë, t'u përmbahet angazhimeve zyrtare të Shqipërisë, duke rritur vit pas viti buxhetin deri në 2% të GDP në vitin 2024. "Shqipëria është një anëtare e NATO- s, e pozicionuar në mënyrë të vendosur në procesin e integrimit europian, duke pritur që të hapë negociatat e pranimit të saj. Shqiptarët e kanë bërë zgjedhjen e tyre, për t'u bashkuar me NATO- n dhe Bashkimin Europian. Askush nuk mund t'ia ndryshojë rrugëtimin këtij projekti strategjik. Do punoj pa u lodhur për një Shqipëri të qëndrueshme, demokratike dhe anëtare të denjë të NATO- s, që siç tha Sekretari i Përgjithshëm Stoltenberg gjatë vizitës së Tij në Tiranë, ka në zemër demokracinë", - u shpreh kreu i shtetit. Gjithashtu, Presidenti Meta, nënvizoi se roli dhe prezenca e NATO- s në rajon është faktor kyç për sigurinë, paqen dhe stabilitetin e Ballkanit Perëndimor. Kreu i shtetit shprehu mbështetjen e tij ndaj përpjekjeve të qeverisë së Kosovës, për integrimin në NATO dhe ngritjen e Forcave të Armatosura si "kontribut shtesë për sigurinë dhe stabilitetin afatgjatë të rajonit".