SHÇBA në aksion, arrestime dhe pezullime të policëve për korrupsion
TIRANË - SHCBA në bashkëpunim me Prokurorinë e Tiranës ka ekzekutuar vendimet e Gjykatës së Shkallës së Parë Tiranë për 5 punonjës policie dhe 1 shtetas, për korrupsion. Lajmi u bë me dije dje nga Ministria e Brendshme. Ndërkaq, mësohet se Gjykata ka dhënë masa sigurie për policët e ndaluar, ku Fiqiri Xhani, 58 vjeç u la në "Arrest me burg", Afinisa Metani 25 vjeçe e Bujar Allka 48 vjeç u lanë në "arrest shtëpie" dhe Fatjon Lunga 35 vjeç, "Detyrim paraqitje". Ndërsa, Emiljano Kacelli 28 vjeç e Florion Dimraj 38 vjeç, u pezulluan nga detyra. Sipas burimeve të mësipërme, të gjithë personat e mësipërm janë efektivë të Rrugores, të cilët shantazhonin shoferët duke u kërkuar shuma të ndryshme parash për të mos u hequr patentat.
NJOFTIMI I MB
Drejtoria Rajonale e SHÇBA- së Tiranë, në bashkëpunim me Prokurorinë Pranë Gjykatës së Shkallës së Parë Tiranë ka kryer hetime në kuadër të procedimit penal të vitit 2019 regjistruar për veprën penale të "Shpërdorimit të Detyrës" dhe "Korrupsionit pasiv nga persona që ushtrojnë funksione publike", parashikuar nga nenet 248 dhe 259 të Kodit Penal, në ngarkim të punonjësve të policisë së Komisariatit Rajonal të Policisë Rrugore Tiranë. Në përfundim të aplikimit të metodave speciale të hetimit janë grumbulluar prova paraprake, mbi bazën e të cilave, Gjykata e Shkallës së Parë Tiranë ka vendosur masat e sigurimit në ngarkim të shtetasve: "Arrest me burg" për punonjësin e policisë F. XH., 58 vjeç, nga Tirana. Duke u nisur nga rrethanat familjare referuar të dhënave të gjendjes civile ( fëmijë nën moshën 3 vjeç) caktimin e masës së sigurimit personal "Arrest shtëpiak" për punonjësen e policisë A. M., 25 vjeçe, nga Tirana; "Arrest në shtëpi" për punonjësin e policisë B. A., 48 vjeç, nga Tirana; "Pezullim i ushtrimit të detyrës", për punonjësin e policisë E. K,. 28 vjeç, nga Tirana; "Pezullim i ushtrimit të detyrës" për punonjësin e policisë F. D., 38 vjeç, nga Tirana dhe "Detyrim për t'u paraqitur në policinë gjyqësore" për shtetasin F. L., 35 vjeç, nga Tirana, i dyshuar për veprën penale të "Korrupsionit aktiv nga persona që ushtrojnë funksione publike".