Tarifat noteriale, ' Konkurrenca'ministrisë: Të orientohen nga kosto
Ndryshimi i pronësisë së mjetit, noterët kundër DPSHTRR, ankohen te ' Konkurrenca' "Shërbimet të mbështeten në një metodologji llogaritjeje"
Tarifat për shërbimet noteriale pritet të ndryshojnë së shpejti. Ato do të mbështeten në një metodologji llogaritjeje dhe do të orientohen drejt kostos. Ministria e Drejtësisë do të rishohë tarifat e shërbimeve te noterët pas kërkesës që i ka bërë Autoriteti i Konkurrencës. Shkak për ndërhyrjen e Autoritetit të Konkurrencës është bërë një ankesë nga Dhoma e Noterëve Tiranë, lidhur me faktin që prej datës 1 mars të këtij viti, shërbimi i ndryshimit të pronësisë mbi automjetet ofrohet direkt në sportelet e Drejtorisë së Përgjithshme të Shërbimeve të Transportit Rrugor ( DPSHTRR). Noterët pretendojnë se kalimi i pronësisë përmes këtij institucioni pa nënshkruar një kontratë noteriale bie në kundërshtim me ligjin. Megjithatë, pasi ka kërkuar informacion nga palët dhe i ka thirrur në seanca dëgjimore, Autoriteti i Konkurrencës nuk e ka mbështetur një pretendim të tillë.
VENDIMI
Prej datës 1 mars 2019, Drejtoria e Përgjithshme e Shërbimit të Transportit Rrugor ( DPSHTRR) ka nisur të ofrojë shërbimin e ndryshimit të pronësisë së mjetit në sportelet e saj. Kjo procedurë më herët ofrohej vetëm nga noterët, të cilët kanë ankimuar pranë Autoritetit të Konkurrencës ( AK) nismën e DPSHTRR- së. Në një vendim të pak ditëve më parë, Autoriteti i Konkurrencës ka analizuar kërkesën e bërë nga Dhoma e Noterëve dhe më pas ka kërkuar informacion pranë DPSHTRR. Kjo e fundit bëri të ditur se ka të gjithë infrastrukturën e nevojshme për shtirjen dhe ofrimin e shërbimit në mbarë territorin e vendit, duke pasur edhe burimet njerëzore me staf profesional të dedikuar për kryerjen e këtij shërbimi me korrektësi, siguri juridike dhe efikasitet. "Synimet e kësaj nisme sipas DPSHTRR- së kanë qenë ulja e informalitetit, sensibilizimi dhe finalizimi në një sportel të së gjithë procedurës për ndryshimin e pronësisë së mjetit; ulja e barrës financiare ndaj qytetarëve për marrjen e këtij shërbimi, pasi në kuadër të reformës së derregullimit, DPSHTRR siguron vetë nëpërmjet sistemit informatik të gjitha të dhënat korrekte për dokumentacionin e mjetit, debitë ndaj tij si vërtetim për taksa etj., konfirmime në Interpol, konfirmim nga RBS etj.", ka argumentuar Drejtoria e Përgjithshme e Shërbimit të Transportit Rrugor. Kjo e fundit ka argumentuar edhe se kjo tarifë është më e ulët krahasuar me tarifën që ofron shërbimi i noterisë, sepse sipas DPSHTRR, së pari të dhënat e shitësit dhe blerësit merren automatikisht nëpërmjet sistemi informatik nga regjistri i gjendjes civile. Së dyti, të dhënat për mjetin merren automatikisht nga sistemi informatik e DPSHTRR. Së treti, koha e shkurtër e punës së punonjësit të specializuar që merret me hartimin e kontratës së ndryshimit të pronësisë së mjetit. Autoriteti i Konkurrencës ka parë edhe ecurinë e ofrimit të shërbimeve nga dyja palët dhe rezulton se nga 1 mars 2019 deri në 19 qershor 2019 janë kryer në total 22 118 procedura të ndërrimit të pronësisë, ku 16 583 procedura janë kryer nëpërmjet kontratave noteriale dhe 5 535 procedura janë kryer me shërbimin e ndryshimit të pronësisë nga DPSHTRR. Kjo do të thotë që 25 për qind e qytetarëve kanë marrë shërbimin nga DPSHTRR. Në këtë situatë ku në fakt shërbimi i ofruar nga DPSHTRR ka qenë me përfitim për konsumatorin, Konkurrenca ka kërkuar që noterët të rishikojnë tarifat për shërbimet e tyre, për t'u bërë më konkurrues. Ky rishikim në fakt duhet të bëhet nga Ministria e Drejtësisë.