Meta: Prishja e Teatrit është krim kushtetues, drejtësia do veprojë
Kreu i shtetit ankimoi në Kushtetuese ligjin për ndërtimin e godinës së re "S'ka forcë që më ndalon për të vënë para drejtësisë rilindasit"
Gati një vit nga mirati mi për herë të parë në Kuvend, Presidenti i Republikës si rrallëherë më parë në historinë e pluralizmit shqiptar është paraqitur vetë fizikisht për ankimuar në Gjykatë Kushtetuese ligjin "Për përcaktimin e procedurës së veçantë për vlerësimin, negocimin dhe lidhjen e kontratës me objekt projektimi dhe realizimi i projektit urban dhe godinës së re të Teatrit Kombëtar". I shoqëruar edhe nga këshilltarët e tij, Meta në prani të mediave ka dorëzuar në sekretarinë e Gjykatës Kushtetuese kërkesën për shfuqizimin e këtij ligji si në kundërshtim me Kushtetutën dhe me marrëveshjet ndërkombëtare. Ndërkohë në përgjigje të interesit të gazetarëve, Presidenti Ilir Meta nisur pikërisht nga debati i fortë lidhur me Teatrin Kombëtar tha se jo pa qëllim vendi është lënë pa Gjykatë Kushtetuese sot. "Dua t'i siguroj të gjithë se do të veprojë drejtësia shqiptare e ndërkombëtare ndaj rilindësve lokalë e ndërkombëtarë që ka lënë vendin pa Gjykatë Kushtetuese. Nuk jemi rastësisht pa Gjykatë Kushtetuese dhe fajin nuk e ka reforma, jo. Reforma e votuar me 140 vota në Kuvendin
e Shqipërisë në mesnatën e 22 korrikut nuk e linte Shqipërinë pa gjykatë. Pa Gjykatë Kushtetuese e la Ramaforma. Dhe është Ramaforma ajo shkatërroi KED- n në 2017 dhe KED në 2018 dhe përpiqet me të gjitha format për të kapur këtë institucion", - tha Presidenti i Republikës, Ilir Meta. Më tej, ai tha se është i vendosur që të çojë para drejtësisë këdo nga ata që ai i quajti rilindasit, që sipas tij kanë goditur reformën në drejtësi dhe janë bërë pjesë e këtij "krimi kushtetues". "Të jeni të sigurt se edhe drejtësia shqiptare, edhe drejtësia ndërkombëtare do të veprojë një ditë për të gjithë ata që janë përfshirë në këtë krim, që është simbol i kapjes së shtetit. Prishja e teatrit është një krim kushtetues, përpjekje për të instaluar me dhunë ' Rule of oligarchs'. Nuk ka forcë në botë që më ndalon mua për të vënë para drejtësisë rilindësit që kanë goditur reformën për t'u dhënë drejtësinë oligarkëve", - vijoi Meta. Duke folur për kërkesën e paraqitur në Gjykatën Kushtetuese, Meta shtoi se projekti i Teatrit Kombëtar është në dhunim të Kushtetutës dhe të interesave kombëtare. "Në radhë të parë, dua të theksoj rëndësinë e madhe që ka ky akt sot. Në koherencë me përpjekjet e mia në raport me kuvendin, qeverinë, të përfshira në këtë proces kriminal të kapjes më flagrante të shtetit në dhunim të rendin kushtetues dhe njëkohësisht në kundërshtim të plotë edhe me interesat kombëtare. Ligji është një simbol, kryevepër ku si asnjëherë më parë kryhet në harmoni, një krim kushtetues kombëtar kulturor, e gjitha në interesa të asaj që mund ta quaj rregull i oligarkëve. Dua t'i siguroj të gjithë se kam ardhur këtu për të garantuar që republika do jetë vend i sundimit të ligjit dhe popullit. Boll me sundimin e oligarkëve. I domosdoshëm të ndërpritet akti i këtij sundimi", - tha Meta. Ndërsa i bën një analizë gjithë praktikës legjislative të miratimit të këtij ligji, Presidenti i Republikës rendit një sërë pretendimesh që sipas tij e bëjnë këtë antikushtetues. Presidenti i Republikës, në cilësinë e palës kërkuese në këtë gjykim kushtetues, vlerëson se ligji në fjalë nuk është në përputhje me parimet kushtetuese, bie ndesh me dispozitat e Kushtetutës së Republikës së Shqipërisë dhe me aktet ndërkombëtare ku Republika e Shqipërisë aderon apo ka ratifikuar. Po ashtu, Meta theksoi se ky ligj bie ndesh edhe me përcaktimet e Marrëveshjes së Stabilizim- Asociimit dhe se në thelb dispozitat e këtij ligji përmbajnë kritere diskriminuese që nuk garantojnë konkurrencën e lirë.