Regjistrimi në universitete, afatet e plotësimit të formularit A2

"Sot mund të kryeni pagesën e tarifave, si do të vijohet me përzgjedhjen e degëve" Raundi i parë dhe i dytë i aplikimeve, zbardhet kalendari

Vetëm pak ditë i ndan mijëra maturantë nga aplikimi online për përzgjedhjen e 10 degëve të preferuara për të vazhduar në këtë mënyrë studimet e larta. Sipas kalendarit të publikuar nga u- albania, brenda ditës së sotme të interesuarit mund të kryejnë pagesën e tarifave, ndërkohë që kanë pasur 29 ditë kohë për të realizuar këtë proces. ' Gazeta Shqiptare' zbardh sot procedurën e plotë që duhet të ndjekin maturantët që synojnë të vijojnë rrugëtimin akademik në ciklin e parë Bachelor, në universitetet me karakter profesional apo në programet e integruara të ciklit të dytë. Gjithashtu, kandidatët e interesuar tashmë mund të njihen edhe me kalendarin për procedurat e aplikimit dhe regjistrimit në IAL- të publike e jopublike. Pas përfundimit të pagesës së tarifave, maturantët mund të aplikojnë në portalin ualbania për 10 programet e parapëlqyera prej datës 31 korrik deri në 5 gusht të këtij viti. E gjithë procedura dhe datat përkatëse që duhet të respektojnë maturantët janë pasqyruar edhe në udhëzimin e përbashkët të Qendrës së Shërbimeve Arsimore dhe Qendrës Ndërinstitucionale të Rrjetit Akademik Shqiptar që mban firmën e dy titullarëve të këtyre institucioneve. "Urdhëroj miratimin e kalendarit "Për procedurat e aplikimit dhe regjistrimit në programet e ciklit të parë të studimeve, në programet e studimeve me karakter profesional si dhe në programet e integruara të ciklit të dytë, në institucionet e arsimit të lartë për vitin akademik 2019- 2020. Ngarkohen për zbatimin e këtij urdhri Qendra e Shërbimeve Arsimore, Qendra Ndërinstitucionale e Rrjetit Akademik Shqiptar, Drejtoritë Rajonale dhe Zyrat Vendore të Arsimit Parauniversitar dhe IAL- të publike dhe jopublike",theksohet në udhëzimin e përbashkët.