Shpërthen transformatori elektrik, vdes punëtori i firmës së ndërtimit, plagosen dy të tjerë
"Ky defekt la pa energji bizneset përgjatë autostradës, zonën e Kamzës, Vorën dhe Mëzezin" Reagon OSHEE: Punëtorët e firmës kanë shkurtuar distancën me linjën 110 kw të OST, çka ka shkaktuar masë
Një transformator i tensionit të lartë ka shpërthyer mesditën e djeshme në një objekt në ndërtim në rrugën dytësore në autostradën TiranëDurrës, duke i marrë jetën një punëtori të një firme private ndërtimi dhe plagosur dy të tjerë. Mësohet se viktima është Gjergji Sula. Ai dhe dy punëtorë të tjerë, Sari Çollaku dhe Fari Çollaku ranë në kontakt me rrymën elektrike në transformator. Ndërkaq, njëri prej të plagosurve është në gjendje të rëndë, kurse punëtori tjetër jashtë rrezikut për jetën, në Qendrën Spitalore Universitare "Nënë Tereza", në repartin e djegieve. Nisur nga situata e krijuar, OSHEE ka ndërhyrë duke stakuar për disa momente energjinë elektrike në nënstacionin e Kasharit, për të shmangur pasoja më tragjike nga shpërthimi i shkaktuar. Ndërkaq, burime policore bënë me dije se transformatori shpërtheu si pasojë e një shkëndije elektrike. Ndërsa, në një reagim më të detajuar për ngjarjen, Operatori i Shpërndarjes së Energjisë Elektrike, sqaroi se: "Një kompani private, ishte duke kryer punime në autostradë, ku punëtorë të kësaj firme kanë tentuar të shkëpusin rrymën elektrike në linjën 110 kw të OST, çka ka shkaktuar masë". "Rreth orës 12: 00, në autostradën Tiranë- Durrës në afërsi të një objekti në rekonstruksion si pasojë e një shkëndije elektrike ka shpërthyer një transformator elektrik. Si pasojë e shpërthimit kanë mbetur të dëmtuar 3 punonjës e këtij objekti dhe
konkretisht shtetasit: GJ. S., S. Ç. dhe F. Ç., të cilët u dërguan në spital për ndihmë mjekësore. Grupi hetimor ndodhet në vendngjarje dhe po vijon punën për sqarimin e mëtejshëm të rrethanave të ngjarjes", njoftoi policia.
REAGIMI I OSHE- SË
Për shkak të punimeve të kompanisë "4AM", me vendndodhje pranë "Coca Cola"- ës në autostradë, ku dy punëtorë të kësaj firme kanë shkurtuar distancën me linjën 110 kw të OST, çka ka shkaktuar masë, ka mbetur për disa minuta i stakuar NST Kashar.
Ky defekt la pa energji bizneset përgjatë autostradës, zona e Kamzës, Vora dhe Mëzez. Grupi i punës së avarisë së OSHEE mori masa për furnizimin menjëherë të nënstacionit me linjën rezervë dhe aktualisht kanë marrë energji të gjithë zonat e lartpërmendura. Aktualisht kemi stakuar për masë vetëm fiderin që furnizon me energji zonën pranë "Coca Cola"- ës.