Në Teatrin Kombëtar protestuesit vënë shfaqje, Rama: Andrea do teatër të ri
Ripublikohet deklarata e OSBE të 26 korrikut: Palët të tregojnë vetëpërmbajtje
Edhe aktorja Ema An drea mendon si disa kolegë të saj artistë, të cilët janë shprehur pro një Teatri të ri Kombëtar. Kështu e nis kryeministri i vendit Edi Rama, postimin e tij të radhës për Teatrin Kombëtar. Prej ditës kur aktorët që e mbrojnë teatrin prej 18 muajsh, morën godinën pasi u përplasën me policinë, kryeministri poston mendime të artistëve që duan teatër ri ( në pikëpyetje mbetet nëse me këtë duan të shembet i vjetri).
Përmes një postimi në ' Facebook', kreu i qeverisë zbulon se një ndër emrat më të spikatur të skenës mbështet ndërtimin e Teatrit të ri Kombëtar. Postimi i plotë i kryeministrit Rama: "Ja sa qartë dhe bukur shprehet dhe Ema Andrea, një ndër emrat më të spikatur të skenës, në mbështetje të ndërtimit të Teatrit të ri Kombëtar
EMA ANDREA: Unë do doja t'i përkisja sot, si Ema, brezit që po ndërton të ardhmen, pra të vihet një gur sot që mua të më përfaqësojë në 2220. Më pëlqen arkitektura e re, më pëlqejnë sfidat kontemporane. Jam për një teatër të ri, për më tepër kur thuhet se ka këto kushte, por tani meqë janë këto kushte dhe ne i dimë dhe po i themi hapur të gjitha kushtet, kush e mban përgjegjësinë?".
Jo pak herë pas postimeve të kësaj natyre, mazhoranca ka dalë blof. Një postim i ngjashëm për Rajmonda Bulkun, u kthye ne bumerang, kur aktorja tha se do të donte të ishte me kolegët protestues dhe se do një teatër të ri duke ruajtur të vjetrin, ndërkohë që doli kundër tërheqjes zvarrë nga policia të aktorëve.
Po ashtu një reagim të fuqishëm pati kundra, edhe djali i Mihal Luarasit. I ndarë nga jeta, pas postimit të kryeministrit, i biri që prej netësh ruan teatrin nga policia e bastisja, shkroi "mos i trazoni të vdekur zoti kryeministër" dhe përcolli dëshirën e të atit për mbrojtjen e godinës së Teatrit Kombëtar.
OSBE
Ditën e djeshme për çështjen e teatrit ka pasur reagim edhe OSBE.
Sekretari i Përgjithshëm i OSBE- së, Thomas Greminger ka bërë një tjetër deklaratë në përgjigje Aleancës për Mbrojtjen e Teatrit. Ai shkruan se përgjigja e tij ndaj ftesës publike është nxjerrë nga konteksti. Në përgjigjen e tij ndaj Aleancës për Mbrojtjen e Teatrit, sekretari i OSBE shprehet se kjo çështje është politike, ndërsa shton se institucioni që ai përfaqëson, u ka kërkuar partive politike të vetëpërmbahen dhe të presin vendimin e institucioneve ligjore mbi debatin e krijuar për prishjen apo jo të godinës së Teatrit Kombëtar.
"Vërej me shqetësim se përgjigja ime ndaj një ftese publike është nxjerrë nga konteksti. Këshilla ime për të gjitha palët ishte dhe është që të ushtrojnë vetëpërmbajtje dhe t'i lënë procedurave institucionale kohën e duhur për marrjen e një vendimi në lidhje me një çështje të ndjeshme e të politizuar. Jam i bindur se institucionet do të jenë të afta që t'i japin zgjidhje kësaj çështjeje ligjore, në përputhje me sundimin e ligjit dhe parimet demokratike. Unë dhe OSBE mbetemi të përkushtuar që të mbështesim procesin e reformave"- shkruan ai.
TEATRI NIS SHFAQJET
Por, ndërsa debati është bërë tejet teknik dhe shpesh i dalë nga thelbi për të cilin mbahet protesta, artistët që protestojnë prej një viti, pas marrjes së godinës, kanë nisur shfaqjet.
Sot me datë 1 gusht në kuadrin e Festivalit për Mbrojtjen e Teatrit në sallën e Teatrit Kombëtar në orën 20.30 aktori Arben Bajraktaraj do të interpretojë një tekst të Teki Dervishit nga "Shtëpia e Sëmurë" dhe më pas aktori amerikan Bob Berkey do të performojë një pjesë nga repertori i tij xhestikulativ! Beteja për Mbrojtjen e Teatrit Kombëtar vazhdon me Art.
Dje, Naim Berisha dhe Robert Budina kanë folur mbi idenë e sapodiskutuar që në javët që vijnë të përgatisin e zhvillojnë në Teatrin Kombëtar një forum me shkrimtarë, artistë, muzikantë nga Shqipëria e Kosova.
Naimi do të vijë, gjithashtu, me një monodramë në skenën e Teatrit Kombëtar në kuadër të Festivalit për Mbrojtjen e Teatrit.
Po dje, ka dalë edhe një qëndrim nga SIRA, Shoqata Italiane për Restaurimin e Arkitekturës. Ajo është një nga shumë organizatat e specializuara ndërkombëtare që është shprehur në favor të ruajtjes së godinës së Teatrit Kombëtar. Ajo i bashkohet thirrjeve publike të Europa Nostra dhe Docomomo International.