Mediu: Çdo gjë ka marrë fund, Kuvendi të shkarkojë anëtarët e KQZ

Të

paprecedentë dhe tepër të rrezikshme për demokracinë dhe funksionimin e institucioneve. Kështu e ka cilësuar kryetari i Partisë Republikane, Fatmir Mediu, mosparaqitjen e djeshme të anëtarëve të majtë në mbledhjen e Komisionit Qendror të Zgjedhjeve. Në një reagim në rrjetet sociale, Mediu ka theksuar se me këtë veprim, ata i kanë rënë ndesh dekretit të presidentit. "Çdo gjë ka marrë fund, s'ka Kushtetutë, s'ka shtet, s'ka institucione, jetojmë në Republikë bananesh. Partia Socialiste me mospjesëmarrjen e saj në KQZ ka bojkotuar zgjedhjet dhe institucionet. Mosparaqitja e anëtarëve të KQZ- së në mbledhjen e sotme është precedenti më i rëndë që nga krijimi i këtij institucioni. Ata sot jo vetëm i kanë rënë ndesh dekretit të presidentit në fuqi dhe s'kanë respektuar detyrimin e tyre kushtetues dhe ligjor për të organizuar zgjedhje, por kanë thyer edhe betimin e bërë para Kuvendit kur kanë marrë detyrën", - tha Mediu. Ndaj, ai theksoi se ky veprim i tyre është shkak i mjaftueshëm për shkarkim nga detyra që mbajnë. Për këtë arsye, ai kërkoi mbledhjen e menjëhershme të Kuvendit dhe shkarkimin e tyre. "Ky është shkak për shkarkimin e tyre të menjëhershëm. Kuvendi duhet të mblidhet menjëherë e të marrë masa. Duke mos u paraqitur, ata kanë zhveshur veten nga zyrtarë apolitikë dhe kanë marrë hapur krah politik, si celulë e Partisë Socialiste", - u shpreh kryetari i PR- së. Nga ana tjetër, ai theksoi se është përgjegjësi i opozitës që t'i japë zgjidhje kësaj situate, ku socialistët nuk pranojnë të organizojnë zgjedhje. "Opozita ka përgjegjësinë historike për të gjetur zgjidhje, në partneritet me faktorin ndërkombëtar dhe shqiptarët", - theksoi kreu i republikanëve.