Rama, bizneseve: Do paguani sa qimet e kokës nëse shkelni ligjin
Braçe inspekton depozitat e karburantit në Porto Romano
Kryeministri
Edi Rama ka zgjedhur ditën e djeshme që sërish të japë një mesazh të qartë për të gjithë bizneset që nuk respektojnë ligjin. Përmes një postimi në "Facebook", Rama pohoi se të gjithë do të futen në rreshtin e ligjit, ndërsa ata që abuzojnë me të do ta pësojnë. "Koka bën, koka pëson dhe nuk thotë kot populli, tahmaja e madhe të le pa gjë. Vazhdoni bosa vazhdoni, luani si miu me macen me shtetin e me konsumatorin, se do ta paguani me qimet e kokës këtë lojë; kush më shpejt e kush më vonë, o do futet në rreshtin e ligjit, o do mbetet me gisht në gojë", shkruan Rama, ndërsa ka postuar edhe disa foto hotelesh, aktiviteti i të cilëve është bllokuar. Ndërkohë gjatë sitës së djeshme zëvendëskryeministri Erion Braçe dhe drejtoresha e Tatimeve, Delina Ibrahimaj, inspektuan depozitat e karburanteve në Porto Romano. "Ne po mundohemi të kthejmë ligjshmërinë në të gjithë tregun, jo vetëm tregun e karburanteve, por në të gjitha tregjet, kryesisht ato që kanë transaksionet më të mëdha dhe natyrisht kanë edhe detyrimin t'u nënshtrohen detyrimeve ligjore dhe fiskale. Ne nuk duam asgjë përtej kësaj. Ne duam që çdo subjekt në çdo treg të kryejë një transaksion të ligjshëm e për të cilin të lëshojë kupon, faturë tatimore. Inspektorët tashmë po garantojnë që në tregun e karburanteve të mos ketë më regjim manual. Ne do çojmë deri në fund zbatimin e ligjit në këtë aspekt", u shpreh zv. kryeministri Braçe, duke shtuar se nën vëzhgim do të jenë 2000 pompa karburantesh të identifikuara, të cilat në mënyrë të menjëhershme do të kthehen nga regjimi manual në atë automatik, duke bërë të mundur kthimin e çdo qindarke të munguar në arkën e shtetit si pasojë e mashtrimit dhe evazionit. Ndërsa për drejtoren e përgjithshme të Tatimeve, Delina Ibrahimaj, ky është një proces që do të shtrihet në të gjithë territorin e Shqipërisë dhe do të prekë nga më të mëdhenjtë te më të vegjlit, pasi "ligji duhet respektuar njëlloj". Aktualisht në prokurori gjenden 30 dosje për shmangie nga detyrimet tatimore dhe dy persona janë arrestuar.