"S& P" s'ndryshon notën e Shqipërisë: Trazirat dhe përplasjet politike po ngadalësojnë reformat

Financat: Konfirmimi bazohet në rritjen e qëndrueshme ekonomike dhe uljen e borxhit Agjencia: Vendi po përpiqet për një hap drejt BE- së

Standard and Poor's" dhe "Moody's" kanë vendosur të mbajnë të pandryshuar notën e borxhit sovran të vendit tonë, në B+ me perspektivë të qëndrueshme. Në publikimin më të fundit për vendin tonë, gjiganti i vlerësimeve thotë se një përmirësim i notës mund të vijë gjatë dy viteve të ardhshme, në rast se do të kemi një periudhë rritjeje të qëndrueshme, të përmirësohet klima e biznesit si dhe të tkurret ekonomia informale. Ndërkohë, faktorë të uljes së notës së borxhit sovran do të ishin edhe skemat e Partneritetit Publik- Privat, për shkak të detyrimeve të prapambetura që krijojnë, duke kërcënuar buxhetin dhe financat publike. Për sa u përket gjetjeve kryesore nga performanca e ekonomisë shqiptare, "Standard and Poor` s" e vë theksin edhe te fakti se pavarësisht trazirave politike të kohëve të fundit, pret që hapi i reformave të vazhdojë, duke marrë shtysë nga aspirata për integrimin europian, paçka se me një hap më të vogël se më parë. Këtë gjë, institucioni e sqaron edhe më tej mes rreshtave duke thënë se trazirat politike mund të ngadalësojnë axhendën e reformave. Përveç përplasjeve mes pozitës dhe opozitës, si dhe daljes së kësaj të fundit nga parlamenti, ' S& P' flet edhe për përplasjen mes qeverisë dhe Presidentit të Republikës, Ilir Meta. Madje, agjencia thotë se shtyrja e negociatave nga BE- ja mund të ketë ardhur edhe si rrjedhojë e këtyre përplasjeve, paçka se jo domosdoshmërish.

REAGIMI I MINISTRISË

Ministria e Financave dhe Ekonomisë ka mirëpritur vendimin e agjencisë prestigjioze dhe deklaron se ky konfirmim bazohet në rritjen e qëndrueshme ekonomike dhe vijimësinë e saj në periudhën afatmesme. Uljen e borxhit publik dhe deficitit, si dhe përmirësimin e llogarisë korrente dhe përballueshmërinë e tyre nga flukset hyrëse të investimeve të huaja direkte. "Agjencitë vlerësojnë se profili makroekonomik i Shqipërisë si dhe parametrat e borxhit kanë vazhduar të përmirësohen. Vlerësimi i qëndrueshëm merr në konsideratë nga njëra anë përmirësimin e profilit makroekonomik, progresin në reformat strukturore dhe institucionale, si dhe konsolidimin fiskal të arritur gjatë viteve të fundit. Vlerësohet se dinamika e rritjes ekonomike është përmirësuar gjatë viteve të fundit me perspektivën ekonomike të favorshme, pavarësisht moderimit të rritjes gjatë këtij viti. Situata e jashtme sidomos e rritjes në vendet partnere të tregtisë, si dhe luhatjet klimaterike përbëjnë rreziqet kryesore ndaj rritjes", - thuhet në njoftimin e Ministrisë së Financave. Sipas ministrisë, pavarësisht se situata e fundit politike identifikohet si një rrezik për perspektivën ekonomike dhe për ritmin e implementimit të reformave strukturore, agjencitë vlerësojnë se qeveria shqiptare do të vijojë me axhendën e reformave në afatin e mesëm, në linjë me aspiratat për integrimin në BE. "Autoritetet po vijojnë në mënyrë aktive përpjekjet për të rritur qëndrueshmërinë e borxhit publik. Agjencitë parashikojnë vazhdimin e konsolidimit fiskal dhe vijimësinë e uljes së borxhit publik në përputhje edhe me rregullin fiskal si dhe i vlerësojnë pozitive përpjekjet e autoriteteve për të përmirësuar administrimin e të ardhurave. Gjithashtu, vlerësohen planet për të rritur rolin e Ministrisë së Financave dhe Ekonomisë në vlerësimin e rreziqeve të mundshme të PPP. Vlerësohet se cilësia e institucioneve shqiptare është përmirësuar në vazhdën e rrugëtimit drejt BE- së, gjë e cila mbështet perspektivën pozitive të rritjes afatmesme. Progres i dukshëm është bërë në reformën në drejtësi, e cila po vijon, si dhe në luftën kundër ekonomisë informale, korrupsionit dhe krimit të organizuar. Ndërkohë që progresi në fushat e ' sundimit të ligjit' dhe ' të drejtave të pronësisë' ka përmirësuar klimën e biznesit", - thotë ministria në reagimin e saj.