Kurban Bajrami, Ruçi thirrje politikës: Të kapërcejmë konfliktet
"Të mësojmë nga myslimanët si kapërcehen mosmarrëveshjet"
Me
rastin e festës së Kurban Bajramit, kryetari i Kuvendit, Gramoz Ruçi, iu drejtua me një mesazh urimi e reflektimi besimtarëve myslimanë shqiptarë, brenda e jashtë vendit. Sipas tij, kjo ditë është një shfaqje e humanizmit dhe solidaritetit njerëzor, dashurisë për të tjerët, nevojtarët, të pamundurit dhe të varfrit. "Është detyra jonë, të kontribuojmë që këto vlera të besimtarëve të përshkojnë gjithë shoqërinë dhe t'i jetësojmë ato në politikat tona për zhvillimin social e njerëzor, në shërbimet sociale e shëndetësore. Modernizimi i shërbimeve dhe i jetës publike e private mund e duhet të harmonizohet më mirë e më natyrshëm me humanizmin, bujarinë, filantropinë dhe përkushtimin e besimeve dhe besimtarëve ndaj të mirës komunitare e publike. Le të mësojmë të gjithë nga toleranca e myslimanëve shqiptarë, të cilët po rrëzojnë mitet e gabuara mbi Islamin dhe po afirmojnë vlerat e tyre properëndimore, proeuropiane e prodemokratike", tha z. Ruci. Sipas tij: "Kurban Bajrami na mëson se nëpërmjet besimit mund të kapërcejmë mosmarrëveshjet, ndarjet e konfliktet politike e shoqërore dhe të mirëkuptohemi e bashkohemi nën flamujt e vëllazërimit, dashurisë dhe devocionit për Shqipërinë. Toleranca fetare e myslimanëve dhe e gjithë besimtarëve shqiptarë të na shërbejë si frymëzim për tolerancën politike dhe bashkëpunimin midis individëve, forcave politike dhe institucioneve në të mirë të Shqipërisë. Besimi në librat e shenjtë të na shërbejë për të konsoliduar besimin te Kushtetuta, ligjet e parimet tona demokratike, në shërbim të së ardhmes europiane të Shqipërisë".