"Të fitojmë kohën e humbur", Kryemadhi: Kriza zgjidhet me sisteme të drejta
Basha, mesazh urimi: Festa e sakrificës dhe besimit
Kreu
i Partisë Demokratike, Lulzim Basha, u uroi dje besimtarëve myslimanë festën e Kurban Bajramit. Në një mesazh në "Facebook", Basha uron që Kurban Bajrami të falë mirësi, mbarësi dhe shëndet për besimtarët dhe familjet e tyre. "Të dashur vëllezër dhe motra besimtarë myslimanë, ju uroj nga zemra gëzuar festën e sakrificës, këtë kremtim të shenjtë të fuqisë së besimit te Krijuesi. Zoti ju faltë mirësi, mbarësi dhe shëndet ju dhe familjeve tuaja dhe Zoti e bekoftë Shqipërinë e shqiptarët kudo ku janë!", shkruan Lulzim Basha në "Facebook". Edhe kryetarja e LSI, Monika Kryemadhi, u përcolli dje një mesazh urimi të gjithë besimtarëve myslimanë me rastin e festës së Kurban Bajramit. Në urimin e saj në "Facebook", Kryemadhi thekson se Kurban Bajrami është festa më simbolike e besimit të plotë te Krijuesi, festë e cila transmeton disa mesazhe esenciale mbi vlerat e jetës dhe mënyrën se si ajo duhet jetuar! "Qëllimi i kurbanit dhe besimit nuk qëndrojnë te materialja, përkundrazi. Sakrifica në emër të Zotit, ndihma për nevojtarët, dashuria në familje dhe paqja janë urtësitë e kësaj feste! Ne të gjithë kemi nevojë që t'i reflektojmë këto parime në jetët tona dhe shoqëri! Shqipëria sot ka nevojë për më shumë solidaritet, në mënyrë që të ofrojë mundësi për një të ardhme më të mirë për të gjithë! Plagët sociale si varfëria, korrupsioni, emigrimi dhe probleme të tjera shoqërore mund të gjejnë zgjidhje vetëm duke ndërtuar sisteme të drejta e të ngritura mbi vlera! Ne duhet të fitojmë kohën e humbur!", shprehet zj. Kryemadhi.