Teqja: Duam përforcime të mira, Kukësi është gati për Partizanin

Nga Mavrova, ku verilindorët po kryejnë përgatitjet e fundit, të gjithë janë të fokusuar te sfida me kampionët në fuqi Mbrojtësi është gati të marrë përsipër repartin e prapavijës

Nga Mavrova, aty ku Kukësi nën drejtimin e trajnerit Shpëtim Duro po u jep dorën e fundit përgatitjeve para se të zbresin fillimisht në fushë për Superkupën ndaj Partizanit, e më pas për startin e Kategorisë Superiore, mbrojtësi Olsi Teqja është shprehur se skuadrës i nevojiten vetëm përforcime të mirëmenduara, pasi nuk duhet fryrë grupi, ndërsa shtoi se tashmë e ka eksperiencën për të drejtuar repartin mbrojtjes. Teqja ndjehet gati për sezonin e ri, por edhe për të marrë përsipër më shumë përgjegjësi në skuadër, teksa praktikisht e ndjen veten një lider në repartin e prapavijës së skuadrës së drejtuar nga Shpëtim Duro.

PËRGATITJET

"Kushtet janë shumë të mira, temperaturat janë normale, nuk është ai i nxehti që është në Shqipëri".

PËRFORCIMET

"Po punojmë me seriozitet dhe presim në repartin e mbrojtjes, që të kemi plotësime. Këtë e dinë drejtuesit që kanë bërë analizën e duhur, se ku çalon ekipi. Shpresojmë të kemi përforcime shumë të mira dhe të kemi një ekip konkurrues për sezonin e ri".

LIDERI

"Kam eksperiencën e duhur për të drejtuar repartin e mbrojtjes. Është një përgjegjësi shumë e madhe, pasi edhe ata që kanë qenë para meje, kanë bërë shumë mirë. Kanë fituar çdo trofe të mundshëm dhe janë për t'u përshëndetur. Edhe unë e fillova mbarë me Kukësin, në 6 muaj morëm një trofe dhe shpresoj të marrim Superkupën".

SYNIMET

"Pretendimet tona janë shumë të mëdha. Kukësi çdo vit futet me pretendime të mëdha. Nuk duhet të shohim ekipet kundërshtare, diferencat në kampionatin shqiptar janë shumë të vogla dhe siç e thashë, shpresoj të bëjmë përforcimet e duhura. Nuk na duhet një fryrje, na duhen vetëm përforcime të mirëmenduara. Kështu do e kemin rrugën e hapur drejt sukseseve të mëdha".