PS "ngrin" Pjetrin, pezullon betimin e tij për të marrë drejtimin e Shkodrës
Edi Rama la të fundit Bashkinë e Shkodrës, si fitoren më të madhe të PS- së në bastionin historik të demokratëve. Por, pasi PD- ja publikoi dokumentet, të cilat dëshmojnë se Valdrin Pjetri ka qenë i dënuar në Itali nën akuzën e prodhimit dhe trafikimit të substancave narkotike, PS- ja ka pezulluar betimin e tij për të marrë drejtimin e kryeqendrës së veriut. Ndërkohë, më 20 gusht i përfundon afati kryetares demokrate, Voltana Ademi, duke e bërë më të paqartë atë që do të ndodhë me drejtimin e bashkisë. "Ora News" raporton se sipas nenint 10 të Kodit Zgjedhor, zgjedhjet duhet të mbahen jo më parë se 30 ditë dhe jo më vonë se 45 ditë nga data e njoftimit të ndërprerjes së mandatit. Ndërkohë, duke qenë se presidenti ka dekretuar datën 13 tetor si datë zgjedhjesh për organet e qeverisjes vendore, për të nuk ka kryetar të zgjedhur në votimet e 30 qershorit dhe as nuk ka kryetar të shkarkuar. Por që të bëhen zgjedhje në këtë datë, duhet që paraprakisht dekreti i presidentit të botohet në Fletoren Zyrtare dhe duhet edhe vullneti i mazhorancës. Refuzimi kategorikisht i 13 tetorit nga PS- ja mund të sjellë një thellim të krizës institucionale. Rasti i kryebashkiakut të Shkodrës nxori hapur edhe dështimin e marrëveshjes mes Prokurorisë së Përgjithshme dhe Komisionit Qendror të Zgjedhjeve për verifikimi i integritetit të kandidatëve për zgjedhjet e 30 qershorit. Valdrin Pjetri e vuri sërish Edi Ramën përballë zgjedhjeve të tij të gabuara në politikë. Elvis Roshi, Armando Prenga, Arben Ndoka dhe Mark Frroku të zgjedhur nga kryeministri për të qeverisur qytetarët, për shkak të dekriminalizimit janë detyruar të dalin jashtë politikës.