Kundërshtuan forcat e policisë, lirohet Balliu dhe protestuesit e tjerë të "Unazës"
Gjykata
Penale e Tiranës la dje të lirë ish- deputetin Klevis Balliu dhe 9 protestuesit e tjerë të arrestuar të dielën në zonën e "Astirit". Seanca për 10 të arrestuarit zgjati rreth 2 orë dhe u zhvillua me dyer të mbyllura, ndërsa në përfundim u dha masa "detyrim paraqitje" për 10 të arrestuarit. Prokuroria kërkoi masën e arrestit me burg për të gjithë të pandehurit dhe cilësimin si të ligjshëm të ndalimit të tyre. Organi i akuzës paraqiti si prova raport shërbimet e policisë dhe pamje filmike të mediave, të cilat u kundërshtuan nga avokatët mbrojtës, pasi sipas tyre nuk mund të mbahen në burg me prova të tilla. Në përfundim të argumentimit nga prokuroria dhe avokatët, gjyqtari Kreshnik Omari vendosi të cilësojë të paligjshëm arrestimin e tyre. Në përfundim të seancës gjyqësore, ish- deputeti i PD- së, Flamur Noka tha se protestat e banorëve të mbështetur edhe nga opozita do të vazhdojnë. "Sado të përpiqet Edi Rama së bashku me bandën e tij të nënshtrojë banorët e ' Unazës së Re' do ta ketë të pamundur. Ata sot kanë kauzën më të drejtë që mund të ketë qytetari në demokraci. Kauza e tyre është e shenjtë dhe qëndresa e tyre ka bërë që sot në sytë e shqiptarëve të jenë heronj të shtëpive të tyre. Do të vazhdojë protesta. Është një protestë e ligjshme. Fakti që ata janë përpjekur t'i akuzojnë për bllokim rruge është përgjegjësi e policisë, që duhet të kishte marrë masa. Koha mund të jetë e batakçinjve, por e drejta është e qytetarëve", tha z. Noka. Vendimi për lirimin e tyre u prit me duartrokitje nga banorët e "Unazës". Seanca u mbajt nën masa të rrepta sigurie për të shmangur çdo lloj incidenti. Pas ndryshimeve të Kodit Penal, ku bllokimi i rrugëve dënohet deri në 3 vite heqje lirie dhe janë arrestuar 16 qytetarë, ku vetëm 3 prej tyre janë lënë në masën arrest me burg.