KQZ tregon kur përfundon numërimi i votave me postë

Qendrën për Numërim dhe Rezultate është duke vazhduar numërimi i fletëvotimeve me postë, proces ky, i cili sipas zëdhënësit të Komisionit Qendror të Zgjedhjeve, Valmir Elezi është duke shkuar mirë dhe nuk ka pasur ndonjë parregullsi. Elezi për "Kosova Press" tha se procesi i numërimit të rreth 13 mijë e 500 fletëvotimeve, të cilat kanë ardhur përmes postë është duke shkuar sipas dinamikës së paraparë. Madje, ai është shprehur optimist se ky proces do të përfundonte mbrëmë, ndonëse në mëngjes është thënë se numërimi do të vazhdojë. Zëdhënësi i Komisionit Qendror të Zgjedhjeve tha se deri nuk kanë hasur në ndonjë pengesë dhe se numërimi i votave me postë është duke u vëzhguar edhe nga partitë politike dhe organizatat joqeveritare. Sipas zëdhënësit të KQZ- së, në këtë proces të numërimit të fletëvotimeve që kanë ardhur përmes postës nuk janë duke u numëruar ato vota, të cilat kanë arritur pas përfundimit të afatit për pranim të fletëvotimeve me postë e që ka qenë data 5 tetor. Rezultati i këtij numërimi është duke u përditësuar kohë pas kohe në tabelën e QNR- së. Deri në dje ishin numëruar gjithsej 5242 fletëvotime nga numri total 13 mijë e 491 vota. Në bazë të rezultatit, udhëheq Lëvizja Vetëvendosje me 2553 vota, e pasuar nga Lidhja Demokratike e Kosovës me gjithsej 972 vota. Ndërsa, Partia Demokratike e Kosovës deri dje kishte marrë 825 vota nga diaspora. Koalicioni AAK- PSD 369 vota, kurse koalicioni Nisma- AKR- PD 356 vota. Kryetarja e KQZsë, Valdete Daka, ka parë nga afër në QNR procesin e numërimit të fletëvotimeve të ardhura me postë.