Kërcënimi i gjykatësit, Shoqata e Gjyqtarëve: Ngjarje të tilla cenojnë ushtrimin e detyrës
"Këshilli i Lartë Gjyqësor të vlerësojë situatën e të marrë masa për mbrojtjen e Kuqos" "Klima armiqësore e Ramës me KÇK- në frymëzoi kriminelët kundër gjykatësit Markelian Kuqo"
Shoqata Kombëtare e Gjyqtarëve ka reaguar përmes një deklarate zyrtare lidhur me kërcënimet për bombë të bërë pak ditë më parë në adresë të gjyqtarit të Korçës, Markelian Kuqo, nga një person i dënuar. "Ngjarje të tilla jo vetëm cenojnë ushtrimin në mënyrë të rregullt dhe efiçente të detyrës nga ana e gjyqtarëve, por krijojnë edhe një pështjellim në jetën private dhe familjare të tyre. Nga ana tjetër, kur precedentë të tillë të rrezikshëm shoqërohen me mosreagimin e organeve kompetente për ndjekjen dhe hetimin e tyre, situata bëhet akoma edhe më e rëndë e shkurajuese për trupën gjyqësore, për kryerjen e misionit të tyre fisnik të dhënies së drejtësisë", thuhet ndër të tjera në deklaratën e gjyqtarëve të Shqipërisë. Ndërsa u bëhet apel të gjitha organeve kompetente që të veprojnë me shpejtësinë dhe përgjegjësinë e duhur, me qëllim që personat të cilët qëndrojnë pas ngjarjeve të tilla, të marrin përgjigjen e duhur ligjore e ato të mos përsëriten më në të ardhmen. "Gjithashtu, kjo shoqatë fton aktorët politikë dhe në mënyrë të veçantë përfaqësuesit e pushtetit ekzekutiv, që të tregohen më të përmbajtur në raport me deklaratat dhe qasjen e tyre ndaj pushtetit gjyqësor. Së fundi, Shoqata Kombëtare e Gjyqtarëve i kërkon Këshillit të Lartë Gjyqësor dhe organeve të tjera të ngarkuara, që në zbatim të detyrimeve të nenit 20 të ligjit nr. 96/ 2016 ' Për statusin e gjyqtarëve dhe prokurorëve në Republikën e Shqipërisë' si dhe akteve nënligjore të dala në bazë e për zbatim të tij, të vlerësojnë situatën me seriozitet dhe të marrin të gjitha masat duhura për mbrojtjen e gjyqtarit në fjalë", përfundon deklarata e gjyqtarëve.
DEKLARATA E PLOTË
Shoqata Kombëtare e Gjyqtarëve të Republikës së Shqipërisë, e cila në bazë të veprimtarisë së saj ka mbrojtjen e statusit të gjyqtarëve dhe promovimin e vlerave më të mira gjyqësore, ka ndjekur me shqetësim ngjarjen më të
fundit në lidhje me kërcënimin serioz, që i është bërë gjyqtarit të Gjykatës së Rrethit Gjyqësor Korçë, z. Markelian Kuqo, nga një person i dënuar. Në të njëjtën kohë, Shoqata Kombëtare e Gjyqtarëve ndjehet e keqardhur për apatinë dhe mungesën e reagimit të duhur nga ana e strukturave përgjegjëse shtetërore. Ngjarje të tilla jo vetëm cenojnë ushtrimin në mënyrë të rregullt dhe efiçente të detyrës nga ana e
gjyqtarëve, por krijojnë edhe një pështjellim në jetën private dhe familjare të tyre. Nga ana tjetër, kur precedentë të tillë të rrezikshëm shoqërohen me mosreagimin e organeve kompetente për ndjekjen dhe hetimin e tyre, situata bëhet akoma edhe më të rëndë e shkurajuese për trupën gjyqësore, për kryerjen e misionit të tyre fisnik të dhënies së drejtësisë. Shoqata Kombëtare e Gjyqtarëve shpreh solidaritetin e saj të plotë me çdo gjyqtar të Republikës së Shqipërisë, i cili në mënyrë kriminale, tentohet të intimidohet për shkak të funksionit që kryen. Për më tepër, ngjarje të tilla, të cilat nuk janë të izoluara dhe nuk kanë të bëjnë me një gjyqtar të vetëm, por synojnë të denigrojnë veprimtarinë gjyqësore në tërësi frymëzohen edhe nga klima armiqësore, që kohët e fundit zyrtarë të lartë të ekzekutivit kanë ngritur ndaj pushtetit gjyqësor. Në këto kushte, Shoqata Kombëtare e Gjyqtarëve u bën thirrje të gjithë organeve kompetente që të veprojnë me shpejtësinë dhe përgjegjësinë e duhur, me qëllim që personat të cilët qëndrojnë pas ngjarjeve të tilla, të marrin përgjigjen e duhur ligjore e ato të mos përsëriten më në të ardhmen. Gjithashtu, kjo shoqatë fton aktorët politikë dhe në mënyrë të veçantë përfaqësuesit e pushtetit ekzekutiv, që të tregohen më të përmbajtur në raport me deklaratat dhe qasjen e tyre ndaj pushtetit gjyqësor. Së fundi, Shoqata Kombëtare e Gjyqtarëve i kërkon Këshillit të Lartë Gjyqësor dhe organeve të tjera të ngarkuara, që në zbatim të detyrimeve të nenit 20 të ligjit nr. 96/ 2016 "Për statusin e gjyqtarëve dhe prokurorëve në Republikën e Shqipërisë" si dhe akteve nënligjore të dala në bazë e për zbatim të tij të vlerësojnë situatën me seriozitet dhe të marrin të gjitha masat duhura për mbrojtjen e gjyqtarit në fjalë.